Kompania ajrore ‘WizzAir’ vazhdon të shkaktojë probleme serioze për udhëtarët shqiptarë, duke anuluar fluturime pa paralajmërim dhe duke lënë pasagjerët pa zgjidhje të qarta për kthimin në shtëpi.
Ish-deputeti i Partisë Demokratike, Luçiano Boçi, ka denoncuar publikisht një incident të fundit ku WizzAir anuloi një fluturim nga Milano pa ofruar datë alternative kthimi. Sipas Boçit, pasagjerët u lanë pa shpjegime dhe pa ndihmë për të gjetur mënyra të tjera për t’u kthyer në Shqipëri, duke i detyruar të kalojnë nëpër një “kalvar të gjatë vuajtjesh”.
Boçi kritikoi ashpër kompaninë, duke e quajtur atë “skandaloze dhe të papërgjegjshme”. Ai shkroi në denoncimin e tij: “WIZZAIR kompania më skandaloze dhe e papërgjegjshme, përsëri le në mes të katër rrugëve shqiptarët. Anullon fluturimin nga Milano dhe nuk garanton asnjë kthim, as për nesër e as për pasnesër.”
Ish-deputeti shkoi edhe më tej, duke sugjeruar se WizzAir duhet të përballet me akuza penale për sjelljen e saj të vazhdueshme problematike. “Është pak të thuash që kjo kompani skandaloze duhet të jetë nën akuzë penale!”, deklaroi Boçi.
Ai gjithashtu kritikoi qeverinë shqiptare për mungesën e veprimit, duke e quajtur “një shtet i ngordhur… që nuk ka në konsideratë qytetarët, i del zot një kompanie të diskredituar.”
Të dhënat për periudhën janar-dhjetor 2023 tregojnë se WizzAir ka pasur performancën më të dobët ndër kompanitë që operojnë në Shqipëri. Kompania ka pasur numrin më të lartë të vonesave mbi 3 orë, me një koeficient prej 26.7 për 1000 fluturime. Gjithashtu, WizzAir renditet e dyta për anulimet e fluturimeve, me një koeficient prej 4.9 për 1000 fluturime, pas Lufthansa-s me 5.2 dhe para Air Albania me 2.5.
Problemet vazhduan edhe në fillim të tetorit, me një fluturim nga Hahn i Gjermanisë që mbërriti në Shqipëri me dy orë vonesë më 3 tetor, duke shkaktuar ankesa të shumta nga pasagjerët e lodhur dhe të irrituar.
Gazeta Reforma ka ngritur vazhdimisht problematikën e shfaqur nga kompanitë ajrore, veçanërisht WizzAir, duke raportuar për vonesat e fluturimeve, mungesën e korrektësisë, anulimet e papritura dhe moskompensimin e udhëtarëve. Në redaksinë e Gazetës Reforma kanë mbërritur denoncime të shumta lidhur me WizzAir, raste këto të cilat janë bërë publike për të informuar publikun dhe për të kërkuar përgjegjësi nga kompania.
