Të gjithë VIP-at e marrin tek doktor Pipero përgjigjet e analizave të Covid-19. Ja si lindi ky trend: Arsyeja e parë është se Pëllumb Pipero është bërë tashmë i famshëm si zëdhënësi i Shëndetit Publik për fushatën e qeverisë mbi parandalimin e përhapjes së Covid-19. Por mos mendoni se përgjigjet i merr nga laboratori shtetëror. Pipero ka klinikën e vet. Ta jep përgjigjen për 30 minuta. Ajo quhet “Pipero Care”, por emrin juridik e ka Medical Center Dr. Pipero. Analizat i kryen në bashkëpunim me Laboratorin Intermedica.
“Doktor Pipero me dha sot lajmin e mirë se e kam mposhtur Covid19. Testi me doli negativ dhe më në fund mbas një periudhe të gjatë izolimi, do t’i rikthehem aktivitetit normal. Kujdesuni ju lutem për shëndetin dhe familjen sepse ky nuk është një virus i lehtë!” shkruan deputetja Rudina Hajdari dhe poston një foto me doktorin
Ndërsa drejtori i lajmeve në SyriTV, Bledian Koka shkruan: “Mëngjesi im “negativ”. U deshën vetëm 10 minuta tek Pipero Care për t’i dhënë fund 10 ditëve karantinim…p.s…Je super figurë Dr. Pëllumb Pipero”.
Ky trend ka lindur nga halli. Sepse kolegët e Piperos i vonojnë analizat në laboratorin e ISHP-së.
Po ta shohim me këtë sy, Pipero nuk ka qejf që Shëndetësia Publike të kryejë në kohë detyrën ndaj të sëmurëve që bëjnë analizat për Covid. Ai është zëdhënësi më i keq i Shëndetit Publik.
Denoncimi
I revoltuar nga kjo situatë, aktivisti i shoqërisë civile, Zirkon Disha shpërthen duke e quajtur këtë biznes një zhvatje. “Kjo është zhvatje ose siç njihet ndryshe “mjekësi falas”, madje është krim. 1 javë i duhet ISHP-së për përgjigjen 4 orë i duhet Pipero-Care”. Deklaron Disha.
“Praktikisht jemi në një PPP (koncesion) të pacertifikuar, por faktik. Spitalet dhe klinikat private kanë me qindra e mijëra raste që ju drejtohen këtyre klinikave dhe laboratorëve për të mësuar statusin e tyre shëndetësor, nëse janë, kanë qenë të infektuar”, deklaron Disha.
Institucionet shtetërore, ISHP-ja dhe laboratorët e spitaleve publike kanë të gjithë kapacitet të ofrojnë këto shërbime me kosto shume më të ulët dhe sigurisht shume me i besueshëm, nëse do kishte dëshire dhe vullnet. Por jo me zëdhënës të tillë, si Pipero.
“E çfarë presim nga Sistemi Shëndetësor Publik, kur thuajse çdo shef pavijoni apo doktor i spitaleve publike ka dhe një klinikë private!? Nuk jam kundër klinikave dhe spitaleve private, por nëse do të bësh biznes shko vëlla në klinikën tënde dhe prezantohu si mjek-biznesmen”, shkruan Disha në rrjetet sociale.
Fakte
Tek klinika e Piperos: Test i shpejtë Covid-19, test serologjik- 4000 lek (përgjigja brenda 30min)
Test serololgjik i plotë, që tregon nivelin e antitrupave IgM – IgG (24 ore) 5000 lek
Tampon test, Testi molekular i cili tregon nëse ka prezence virusi apo jo, 12000 lek. (4 orë)
Në laboratorët e ISHP-se përgjigja e tamponit do 5-7 ditë të marrësh përgjigje, ndërsa për testet e tjera nuk ka informacion.
/GazetaRefoma.com/
