Ditën e djeshme policia e Durrësit sqaroi se ndaj një mjeti të parkuar ishte qëlluar me armë.
Në njoftim thuhej se makina i përkiste një shtetasi me iniciale I.B.
“Faxnews” ka mësuar se makina përdorej nga ish-drejtori i Hekurudhës, Ani Dyrmishi.
Ky i fundit aktualisht mban postin e kreut të Këshillit Bashkiak të Durrësit.
Makina rezulton në emër të I.B., por dyshohet se ky është shoferi i Dyrmishit.
Ani Dyrmishi ka mbajtur gjithashtu postin e kreut të Hipotekës së Durrësit.
Ai përmendet edhe në dosjen e Avdylajve, për të cilën është marrë në pyetje nga Prokuroria.
Dyrmishi ndodhet edhe në listën e zezë të drejtorëve, të bërë publike kohë më parë nga kryeministri Edi Rama.
Ndërsa në nëntor të 2018-ës, u dha alarmi se në makinën e tij ishte vendosur një sasi tritoli.
Në mbledhjen e fundit të Këshillit Bashkiak të Durrësit u regjistrua një incident, ku Dyrmishi mbylli mbledhjen ndërsa kryebashkiakja, Valbona Sako ishte duke folur.
