Një ngjarje e rëndë ndodhi pak pas mesnatës në orët e para të mëngjesit të sotëm, ku një 25-vjeçar u qëllua me armë për vdekje nga një efektiv policie pas ndjekjes që patrulla i bëri të riut pas thyerjes së orës policore.
Për këtë ngjarje të rëndë ka folur edhe xhaxhai i 25-vjeçarit Klodian Rasha, që mbeti i vrarë rreth orës 01:45 si pasojë e mosbindjes së urdhrit të ndalimit nga policia, duke kërkuar që ngjarja të zbulohet deri në fund.
Ai deklaroi se nipi i tij nuk ka pasur armë me vete siç pretendon policia, ndërsa thotë se ngjarja fillimisht iu njoftua në versione të ndryshme, prandaj edhe nuk i beson policisë.
“Në fillim na thanë djali është arrestuar nga policia. Dhe ky ka shkuar sikur është arrestuar. Pastaj kanë thënë se djali ka bërë aksident me policinë. Pastaj kanë thënë se ka vdekur. Djali ka dalë për të pirë kafe.
Ka pasur dy kokrra hurma në dorë i ka lënë në ballkon. Kërkojmë që kjo të zbardhet deri në fund.
Vëllai më ka thënë se djali nuk ka pasur asgjë me vete dhe se nuk ka armë në shtëpi. I bëj apel policisë që këtë punë ta zbardhë deri në fund, se si ka qenë e vërteta”.
Bëhet me dije se viktima ka qenë i dënuar më parë për plagosje të lehtë me dashje dhe për “Heqje të paligjshme të lirisë në vitin 2016”.
Mësohet se punonjësi i Policisë, efektivi i forcave “Shqiponja”, i ka bërë thirrje paraprakisht të riut që të ndalonte, por Rasha nuk i është bindur urdhrit për të ndaluar.
Policia njofton se i gjendur në këto kushte dhe në mungesë të ndriçimit të plotë punonjësi i policisë ka qëlluar me armë zjarri dhe për pasojë ka mbetur i plagosur 25-vjeçari, i cili ka humbur jetën në spital.
Ndërkohë policia njoftoi se gjatë këqyrjes së vendit të ngjarjes dhe zonës përreth u bë e mundur edhe gjetja e armës së zjarrit që dyshohet se i përkiste shtetasit K.R, i cili nuk iu bind urdhrit të Punonjësit të Policisë për të ndaluar.
Punonjësi i policisë shtetasi N.H., është shoqëruar në ambientet e Drejtorisë Vendore të Policisë Tiranë, për veprime të mëtejshme./Gazetareforma.com/
