Ministrja e Arsimit, Evis Kushi ka firmosur ndryshimin e udhëzimit që ndalon aplikimin dhe konkurrimin për të punuar si mësues të personave të dënuar.
Njoftimin e ka dhënë vetë ministrja nëpërmjet një statusi në ‘Facebook’. Kushi shprehet se ka marrë shkas edhe nga rasti i Beratit, ku 62-vjeçari Ëngjëll Bregu i cili rezultonte i dënuar për “pedofili” dhe “ngacmim seksual” të fëmijëve në vitin 2003, ishte emëruar mësues për lëndët e “fizikës” dhe “informatikës”.
Zyra Arsimore Berat pas publikimit të ngjarjes, shkarkoi nga detyra mësuesin e shkollës ‘22 Tetori’ në Berat.
“Duke marrë shkas nga rasti i fundit i punësimit në Berat të një mësuesi që shkaktoi zemërim të lartë publik, sot firmosa menjëherë ndryshimin e udhëzimit që ndalon aplikimin dhe konkurrimin për të punuar si mësues të personave të dënuar, për të cilët gjykata ka marrë vendim të formës së prerë, për kryerjen e një vepre penale kundrejt të miturve apo për kryerjen e një vepre penale që lidhet me institucionet arsimore. Ky vendim shmang rrezikun që mund t’i vijë nxënësve tanë nga persona që nuk garantojnë integritet të lartë moral dhe ligjor. Angazhohemi që të vijojmë me një punë akoma më intensive për të ndërmarrë iniciativa të tjera ligjore që garantojnë më shumë mbrojtjen dhe mirëqenien e fëmijëve tanë”, shkruan Kushi.
Kujtojmë gjithashtu se ministrja e Arsimit dhe Sportit Evis Kushi theksoi sot se proçesi i unifikimit të Abetares mes Shqipërisë dhe Kosovës është vonuar si pasojë e punës së madhe që po bëhet për të.
Kushi iu përgjigj homologes së saj në Kosovë Arbërie Nagavci, e cila u shpreh sot se Shqipëria nuk e ka respektuar marrëveshjen e krijimit të një abetareje të unifikuar mes dy vendeve tona.
“Natyrisht në kontekstin e ri në të cilin ndodhemi, konteksti i ri social, kulturor, zhvillimi i madh i teknologjisë, revolucioni i madh dixhital na bëjnë të shkojmë drejt një Abetareje të re e cila i merr në konsideratë të gjitha këto ndryshime”, u shpreh ministrja e Arsimit Evis Kushi.
Më tej, Kushi foli dhe për lapsuset e botuara në librat shkollorë. Ajo theksoi se në janar të vitit të ardhshëm pret rezultatet nga grupet e punës të ngritura për verifikimin e lapsuseve në librat e shkollave.
“Për çdo tekst ne të verifikojmë nëse ka gabime, qofshin lapsuse apo gabime shkencore. Në fillim të muajit janar ne besoj do kemi rezultatet konkrete, raportet e grupeve të punës që pastaj t’i reflektojmë në korrigjimet përkatëse”, përfundoi ministrja Evis Kushi.
