Qindra policë të infektuar me Covid, zëvendësohen nga kolegët me orë shtesë!

Që pas shpalljes së pandemisë në muajin mars, policia shqiptare kaloi në shërbim të përforcuar, më së shumti duke kontrolluar zbatimin e rregullave antiCovid, siç është së fundmi mbajta e maskës, apo edhe kontrolle në lokale për muzikë pas orës 8 të mbrëmjes.

Policia e Shtetit që pas shpalljes së pandemisë në mes të muajit mars, ka bërë shërbime të përforcuara bazuar edhe në protokollin e ri të masave anti-covid.

Patrullat e policisë kanë kontrolluar gjatë gjithë kohës individët, hapësirat publike, respektimet e akteve normative si mbajtja e maskës, mbyllja e muzikës nëpër lokale pas orës 20:00 të mbrëmjes, si dhe kufizimet e lëvizjeve gjatë fashës orare 22:00-6:00.

Mirëpo dalja në krye të detyrës në terren, ka bërë që policët të jenë shumë të ekspozuar dhe të rrezikuar nga covid-19.

Postblloqet dhe kontrollet e policëve, janë kthyer mesa duket edhe në burim infeksioni për vetë policët, duke rrezikuar jetën e tyre.

Aktualisht sot që po flasim janë rreth 600 efektivë policie të prekur me koronavirus, gjë që ka sjell alarm te shefat e tyre, për mënyrën se si do të organizojnë shërbimet ndaj qytetarëve, duke mbajtur rendin dhe për të parandaluar veprimtaritë e ndryshme kriminale.

Mungesa e punonjësve të policies të infektuar me covid-19, është vënë re në disa komisariate të vendit, dhe jo zyrtarisht mësohet se ata zëvendësohen nga kolegët e tyre nëpërmjet orëve shtesë, duke u shtuar një ngarkesë më të madhe pune.

Deri më tani, infektimi me covid, ka rezultuar fatal për dhjetë efektivë policie, të cilët u infektuan gjatë detyrës.

Pas mjekëve dhe infermierëve, shërbimet e policisë janë në vijën e parë të kontaktit me qytetarët, pasi u duhet të kontrollojnë respektimin e masave anticovid, të jenë në gatishmëri për të parandaluar ngjarjet kriminale apo edhe policia rrugore për kontrollet për parandalimin e aksidenteve, pa e ditur nëse personi që po përballen, mund të jetë mbartës i virusit apo jo./GazetaReforma.com/