Pas nisjes së një proteste tjetër të dhunshme sot në Shkodër dhe pas deklaratës së paradites së Presidentit Meta mbi protestat, ka ardhur i ashpër edhe reagimi i Kryeministrit Edi Rama.
Ky i fundit ka reaguar përmes postimeve në twitter lidhur me protestat në vend, pas vrasjes së 25-vjeçarit Klodian Rasha nga efektivi i policisë.
“Kur policia reagoi ndaj një provokatori famoz gjatë ushtrimit të dhunës opozitare tek Kuvendi, Ilir Meta vrapoi në spital për të vizituar heroin e dhunës! Kur policit të shtetit, i nxjerrin syrin dhunuesit me kapuçë të nxitur prej tij e Saliut, Ilir Meta dënon dhunën policore!
Sipas Ilir Metës policia nuk duhet të reagojë, po duhet të dorëzojë Tiranën dhe veten në duart e dhunuesve të verbër, që ai bashkë me Saliun të bëjnë Lulin dhëndërr të pushtetit dhe Monikën arkëtare të shtetit, si në kohët e arta të bashkëqeverisjes me plumba mbi protestuesit!
Por Iliri dhe Saliu duhet ta harrojnë se e kthejnë prapë Shqipërinë për përsheshin e tyre dhe sado ëndrra të shohë Luli duke mbajtur lugën në dorë që t’i vijë gjella e Monikës, Shqipëria do të vazhdojë drejt përpara, me mund e durim, për t’u bërë ajo që duan fëmijët e saj!”,- shkruan Rama në twitter.
/GazetaReforma.com/
