Pjesëmarrja e minorenëve në protestat e mbajtura për vrasjen e 25-vjeçarit, Klodian Rasha ishte e lartë dhe në shumë raste ata u përplasën me policinë, ku shumë prej tyre edhe u arrestuan.
Në 7 ditë protesta, komisariatet u mbushën plot me minorenë, që përveç dhunës fizike nga policia, përjetuan në qeli edhe dhunën psikologjike. Plasja e tyre me një numër shumë të lartë brenda qelive në komisariate, ndër të tjera ishte edhe thyerje e ,asave anti-covid nga ana e policisë.
Në ligjin për tubimet thuhet se fëmijët nuk duhet të dalin në protesta pa qenë të shoqëruar nga prindërit, por në fakt të miturit vazhduan të jenë pjesë e protestave për 7 ditë me radhë.
Ky fakt është komentuar shumë si për arsye poltike, po ashtu edhe nga gjykimi si fenomen i gabuar social. Por, çfarë thonë ekspertët e fushës për pjesëmrrjen e të miturve në tubime?
Sociologu Gëzim Tushi e sheh këtë veprim si diçka të nxitur nga faktorë të ndryshëm.
Gjatë një interviste televizive ai tha se përfshirja e të miturve në protesta ka ardhur edhe si pasojë e formimit edukativ të marrë nga familja.
“Fëmijët kanë ambientet e tyre natyrale, duhet të rrinë në shkollë, në shtëpi, duhet të merren me formimin e tyre. Kam përshtypjen se tërheqja e tyre në këto tubime është në një farë mënyre një lloj instrumentalizimi, një lloj manipulimi.
Ky është një defekt i madh i formimit të tyre edukativ në familje dhe defekt i prindërimit. Nëse ka fëmijë që kanë dalë jashtë kontrollit të prindërve që në këto momente, ky është një dëm i madh, që do të thotë se familja është në një lloj krize shumë të thellë”, është shprehur sociologu.
Edhe mënyra se si e menaxhoi policia këtë situatë është komentuar shumë.
Disa e gjykuan si të dhunshme sjelljen e policëve, sidomos ndaj të miturve, ndërsa për disa të tjerë nxitja e fëmijëve për t’u bashkuar protestave ishte gabim i madh dhe përdorim politik.
Lidhur me këtë çështje, sociologu Gëzim Tushe shprehet se ndaj minorenëve uniformat blu duhet të zbatojnë një protokoll të veçantë pavarësisht rrezikshmërisë që paraqesin.
Në të njëjtën linjë është shprehur edhe avokati Edvis Gorishti, i cili thotë se strukturat ligjzbatuese, pjesë e të cilave është dhe Policia e Shtetit, janë të trajnuara për mënyrën e trajtimit të kësaj grupmoshe.
“Trajtimi i tyre në protesta duhet të bëhet me shumë kujdes. Ka protokolle të veçanta për t’u marrë me minorenët, ata nuk janë kriminelë, ata janë njerëz që ecin sipas parimit të imitimit.
Policia nuk duhet të përdorë mjete që janë përtej kufijve moshorë të tyre. Të gjitha instancat e Policisë së Sshtetit, pra ajo pjesa që e ndjek në fillim edhe prokurorët, gjyqtarët po ashtu edhe dhoma e avokatisë, të gjitha këto instanca janë trajnuar, janë çertifikuar dhe duhet të jenë të gatshëm në trajtimin e të miturve”, ka thënë avokati Gorishti./Gazetareforma.com/
