Kolegji i Posaçëm i Apelimit (KPA), pas shqyrtimit, ka hedhur poshtë ankimimin e prokurorit të Dibrës, Shkëlzen Cenës, duke lënë në fuqi shkarkimin nga detyra të kërkuar nga Komisioni i Pavarur i Kualifikimit (KPK).
KPK në vendimin e marrë për prokurorin Cena, i gjeti probleme këtij të fundit në tre kriteret e vlerësimit.
Bëhet me dije se vendimi i KPA-së u mor nga trupi gjykues i KPA-së, i përbërë nga Natasha Mulaj kryesuese, Ardian Hajdari relator, Ina Rama, Sokol Çomo dhe Albana Shtylla anëtarë.
Cena ishte i pari prej kandidatëve për të qenë pjesë e Strukturës së Posaçme Anti Korrupsion (SPAK) që do të ngrihet në prokurori. Në hetimin e KPK-së atij iu gjetën probleme të pasurisë, integritetit dhe profesionalizmit.
Kujtojmë se prokurori i Dibrës, Shkëlzen Cena, kishte sipas KPK-së probleme të pasurisë, kryesisht mbi një kredi të marrë për një shtëpi, një kontratë noteriale për të cilën kishte qëndrime kontradiktore, një makinë për të cilën ishin nënshkruar dy kontrata si dhe mungesë burimesh financiare për disa vite.
Njoftimi i KPA:
Trupi gjykues i Kolegjit të Posaçëm të Apelimit, i përbërë nga Natasha Mulaj kryesuese, Ardian Hajdari relator, Albana Shtylla, Ina Rama, Sokol Çomo anëtarë, shpalli vendimin për çështjen (JR) nr.43/2019, datë 18.09.2019, që lidhet me ankimin e subjektit të rivlerësimit Shkëlzen Cena, kundër vendimit nr. 160, datë 14.06.2019 të Komisionit të Pavarur të Kualifikimit.
Në përfundim të gjykimit në dhomë këshillimi, trupi gjykues, bazuar në nenin 66, pika 1, shkronja “a” e ligjit nr.84/2016, “Për rivlerësimin kalimtar të gjyqtarëve dhe prokurorëve në Republikën e Shqipërisë”, në mënyrë unanime, vendosi:
Lënien në fuqi të vendimit nr. 160, datë 14.06.2019 të Komisionit të Pavarur të Kualifikimit, që i përket subjektit të rivlerësimit Shkëlzen Cena.
Ky vendim është përfundimtar dhe ka efekt të menjëhershëm./Gazetareforma.com/
