Ditën e sotme deputetja e Partisë Demokratike Jorida Tabaku ka reaguar pas vendimit të Gjykatës Kushtetuese, e cila rrëzoi Bordin e Transparencës për çmimet e ushqimeve. Në një postim në Facebook, Tabaku shkruan se Bordi i Çmimit kishte vendosur rritjen me 30% në periudhë krize, por që tashmë është nul.
Gjithashtu ajo shton në fund se qytetarët presin të merret vendimi mbi Bordin e Karburanteve që gjithashtu penalizon shqiptarët dhe kënaq oligarkët.
Postimi:
Gjykata Kushtetuese shpëton shqiptarët nga bordet socialiste dhe i jep të drejtë grupit parlamentar të PD! Bordi çmimeve të ushqimeve është antikushtetues! Një tjetër betejë e fituar nga Grupi Parlamentar i PD që dërgoi ne GJK Bordin e Çmimit të Ushqimeve! Bordi komunist, që në periudhë krize ka vendosur çmime abuzive në kurriz të xhepave të shqiptarëve duke rritur me të paktën 30% çmimet e shportës dhe duke bërë biznes me krizën e shqiptarëve, tanimë është nul! Shpresoj shumë që ky të jetë një fillim i mirë dhe për vendimin mbi bordin e karburanteve. Politika në ndihmë të qytetarëve është pikërisht kjo! Pasi kjo e sotmja është një fitore mbi të gjitha e shqiptarëve që përtej bindjeve politike do të çlirohen nga një bord komunist dhe antikushtetues. Bordi Socialist tanimë duhet shkrirë! Ndërsa qytetarët presin të merret vendimi mbi Bordin e Karburanteve që penalizon shqiptarët dhe kënaq oligarkët !
Kujtojmë se sot Gjykata Kushtetuese ka rrëzuar Bordin e Transparencës për çmimet të ushqimeve e shportës, për shkak se aktet normative nuk plotësojnë kriteret kushtetuese të parashikuara në nenin 101 të Kushtetutës. Sipas nenit 101, në rast urgjence, aktet normative duhet t’i kalojnë menjëherë Kuvendit të Shqipërisë, i cili duhet të mblidhet brenda 5 ditëve.
Beteja ligjore në Gjykatë Kushtetuese nisi pasi një grup deputetësh nga Partia Demokratike, me iniciator deputetin Dashnor Sula, kërkuan shfuqizimin e Bordit të Ushqimeve. Bordi i kontrollit të çmimit të ushqimeve hyri në fuqi më 1 prill dhe detyra ishte monitorimi i çmimeve të produkteve të shportës pas rritjes së çmimeve pas nisjes së luftës në Ukrainë. Çmimet, pretendohej se monitoroheshin çdo javë dhe vendosej një çmim tavan.
