Nënkryetari i Partisë Demokratike, Alfred Rushaj ka thënë në Kuvend se qeveria po hakmerret politikisht ndaj njerëzve dhe po përfiton nga frika e tyre se do të mbeten pa shtëpi. Rushaj tha se fondet e tërmetit janë përdorur për të blerë vota dhe shembull tipik për këtë është blloku “Myslym Keta”. Deputeti demokrat vuri në dukje se ekspertiza ka treguar se shtëpitë e këtyre banorëve nuk kanë dëmtime nga tërmeti, por pasi qëndruan brenda për dy vite, tashmë situata ka ndryshuar.
“Pasi i përdorën fondet e tërmetit për të blerë vota; pasi përdorën frikën e njerëzve se do i lënë pa shtëpi për të blerë vullnetin e tyre në zgjedhjet e 25 Prillit; tani po përdoren pronat e tyre për të fituar ata apo njerëzit e tyre.
Një shembull tipik, është rasti i banoreve në bllokun Myslym Keta. Këta banorë që kam pasur rastin t’i takoj edhe para disa muajve edhe tani, kanë kohë që janë nën presion dhe kërcënim për shtëpitë e tyre. Pasi ekpertiza e parë pas tërmetit nxorri se s’kishte dëmtime në strukture, dhe pasi qëndruan dy vite brenda; prej disa muajsh dikush ka ndërruar mendje”, ka thënë Rushaj.
Nënkryetari i PD shtoi se madje në kohën e zgjedhjeve, zv/kryeministri Arben Ahmetaj u kishte treguar banorëve dhe projektin dhe u kishte thënë se do të marrin shtëpitë e tyre, po në atë vend.
“Problemi është se pas zgjedhjeve, ai ka humbur. Projekti mbase jo, po ata se kanë parë më edhe pse e kanë kërkuar. Dhe nuk jane pak, janë 90 familje që presin që ai të mbajë premtimin.
Në vend të tij, ata thonë kanë ardhur punonjësit e ujësjellësit dhe të OSHE që i kërcënojnë se do u presin dritat dhe ujin nëse nuk braktisin shtëpite e tyre.
Tani unë kam një pyetje; si mundet një shtet që të shkojë deri aty sa të kercenoje banorët për trajtim çnjerëzor. Se t’u presësh ujin dhe dritat njerëzve në shtëpitë e tyre, kur i paguajnë dhe jetojnë aty, është trajtim çnjerezor, që edhe në luftë dënohet”, tha Rushaj.
