Dyshime për paracaktimin e fituesit të Aeroportit të Vlorës/ SPAK nuk e mbyll dosjen, zgjat hetimet ndaj 7 anëtarëve të komisionit

SPAK nuk e mbyll dosjen e koncesionit të Aeroportit Ndërkombëtar të Vlorës.

Prokuroria e Posaçme ka vendosur të zgjasë edhe me tre muaj hetimet për procedurën që çoi në dhënien e koncesionit, ndërsa në qendër të çështjes janë shtatë anëtarë të komisionit që vlerësoi dhe shpalli fitues konsorciumin për ndërtimin e aeroportit.

Afati i hetimit është shtyrë deri më 23 nëntor 2026.

Sipas prokurorëve të posaçëm, nevojiten veprime të tjera hetimore për të zbardhur plotësisht mënyrën se si është zhvilluar procedura.

Shtatë anëtarët e komisionit po hetohen nën dyshimin për veprën penale të “shkeljes së barazisë së pjesëmarrësve në tendera apo ankande publike”.

Në dokumentet e dala më herët nga hetimi janë ngritur dyshime se anëtarët e komisionit mund të kenë favorizuar konsorciumin e përbërë nga Mabco Construction, YDA Group dhe 2A Group gjatë kualifikimit dhe shpalljes së fituesit.

Pra, SPAK po verifikon nëse gara që i dha jetë një prej investimeve infrastrukturore më të mëdha të viteve të fundit ka qenë realisht e barabartë apo nëse rezultati ishte favorizuar që në procedurë.

Hetimi nisi pas kallëzimit të kompanisë “Al-De Corporation LTD”, përmes Aldi Çelit.

Por dosja penale është vetëm njëra anë e një historie që gjatë muajve të fundit është kthyer në një konflikt shumë më të madh.

Koncesioni i Aeroportit të Vlorës është futur në një përplasje të fortë mes aksionerëve të projektit, përfshirë kompaninë Mabco Construction të biznesmenit Behgjet Pacolli dhe 2A Group të Valon Ademit.

Konflikti ka përfunduar edhe në arbitrazh, ndërsa qeveria shqiptare ka njoftuar më herët nisjen e procedurave për prishjen e koncesionit.

Kjo do të thotë se një projekt i prezantuar si një prej veprave strategjike të turizmit shqiptar ndodhet sot mes tre fronteve: konfliktit mes ortakëve, përplasjes me qeverinë dhe një hetimi penal të SPAK mbi mënyrën se si u dha vetë koncesioni.

Vendimi për zgjatjen e hetimeve tregon se Prokuroria e Posaçme nuk e konsideron ende të përfunduar verifikimin e procedurës.

Përkundrazi, SPAK ka kërkuar edhe tre muaj kohë për veprime të tjera.

Në qendër mbetet pikërisht momenti fillestar i gjithë historisë: gara që solli shpalljen fituese të konsorciumit.

Nëse dyshimet për favorizim dhe paracaktim të fituesit do të provohen ose jo, këtë duhet ta përcaktojë hetimi.

Por fakti që shtatë anëtarë të komisionit vijojnë të jenë nën hetim dhe se afati është zgjatur deri më 23 nëntor tregon se dosja e Aeroportit të Vlorës është larg mbylljes.

Ndërsa projekti vazhdon të përballet me konfliktet e tij tregtare dhe politike, SPAK po kërkon përgjigjen për pyetjen që qëndron në themel të tij: si u zgjodh fituesi i koncesionit dhe a u respektuan të gjithë pjesëmarrësit njësoj në garë?