Dy vila të Ballukut në emrin e tij, SPAK merr të pandehur Igli Taren për pastrim parash

Prokuroria e Posaçme (SPAK) i ka komunikuar zyrtarisht akuzën për pastrim parash ish-futbollistit të Kombëtares shqiptare, Igli Tare, në kuadër të hetimeve për pasuritë e dyshuara të ish-zëvendëskryeministres Belinda Balluku. Në qendër të dosjes janë dy vila luksoze në Dhërmi dhe Palasë, të regjistruara në emër të Tares, por që prokuroria dyshon se janë në pronësi faktike të Ballukut.

Tare është paraqitur mëngjesin e sotëm, 21 tetor, në ambientet e SPAK, ku është njohur me akuzën. Zhvillimi vjen vetëm një ditë pasi Belinda Balluku u mor zyrtarisht e pandehur për pesë vepra penale, të lidhura me 15 raste të dyshuara shkeljesh.

Emri i Igli Tares nuk shfaqet për herë të parë në dosjen Balluku. Ish-futbollisti është marrë disa herë në pyetje nga hetuesit për marrëdhënien e tij me ish-zëvendëskryeministren dhe mënyrën se si dy prona në bregdetin shqiptar përfunduan të regjistruara në emrin e tij.

Një prej tyre është vila F6 në kompleksin luksoz “White Rocks”, në Gjilekë të Dhërmiut, me vlerë të raportuar rreth 145 mijë euro. Sipas të dhënave të dosjes hetimore, SPAK dyshon se prona është përfituar nga Balluku në këmbim të favorizimit të kompanisë “Eurocol”, të lidhur me biznesmenin Pandeli Carapuli, në tenderët për rikonstruksionin e godinës së Albcontrolit, gjatë periudhës kur Balluku drejtonte institucionin.

Në dokumentacionin e administruar nga hetuesit rezulton një kontratë porosie e datës 5 dhjetor 2018, mes Igli Tares dhe Pandeli Carapulit. Më pas, më 25 maj 2022, është lidhur një kontratë qiraje, ndërsa më 26 prill 2024 është bërë një ndryshim kontraktual ku përfshihet edhe Joana Bushi. Këto veprime janë shqyrtuar nga SPAK për të përcaktuar nëse janë përdorur për të fshehur pronësinë reale të vilës.

Hetimet kanë përfshirë edhe mënyrën e përdorimit dhe administrimit të pronës. Në dosje janë evidentuar të dhëna që lidhen me përdorimin e adresës elektronike të Ballukut në shërbimin Netflix të televizorit të vilës, ndryshimet në kontratën e furnizimit me energji elektrike, si dhe komunikime të personave të afërt me ish-zëvendëskryeministren për administrimin e saj.

Nga ana tjetër, Igli Tare ka deklaruar më herët se prona ishte blerë prej tij në vitin 2018, përmes pagesave bankare. Ai ka pohuar se Ballukun e njeh që nga fëmijëria dhe se ia kishte lënë vilën në përdorim asaj dhe fëmijëve të saj për pushime, duke mohuar se kishte përfituar favore të paligjshme.

Vila e dytë ndodhet në kompleksin “Green Coast”, në Palasë. Bëhet fjalë për një pronë me sipërfaqe trualli prej 478 metrash katrorë, e sekuestruar nga SPAK më 9 shtator. Edhe kjo vilë figuron në emër të Tares, ndërsa hetuesit dyshojnë se përfituesja reale është Belinda Balluku.

Sipas të dhënave të hetimit, kjo pasuri dyshohet se lidhet me favorizimin e kompanisë “Alko Impex General Construction” në tenderin për lotin 7 të Unazës së Madhe të Tiranës, me vlerë afro 30 milionë euro me TVSH. Kompania rezulton fituese e kontratës së bashku me një tjetër operator ekonomik.

Në hetimet për këtë vilë janë administruar gjithashtu komunikime elektronike lidhur me projektimin e saj. Dokumentet e raportuara përfshijnë e-maile të studios “Atelier 4”, drejtuar Ballukut, ku diskutoheshin elemente të projektit të pronës luksoze, përfshirë pishinën dhe vaskat hidromasazhuese.

Dosja e dy vilave është vetëm një pjesë e hetimeve më të gjera ndaj ish-zëvendëskryeministres. Balluku përballet me akuza për shkelje të barazisë në tenderë në nëntë raste, korrupsion pasiv, pastrim parash dhe fshehje ose mosdeklarim pasurie në dy raste.

Hetimet ndaj saj kanë përfshirë gjithashtu procedurat e Tunelit të Llogarasë dhe të Unazës së Madhe, për të cilat SPAK ka shqyrtuar dyshime për shkelje në prokurimet publike.

Marrja zyrtarisht e pandehur e Igli Tares e vendos sërish në qendër të hetimit çështjen e personave që dyshohet se kanë shërbyer si prestanomë për fshehjen e pasurive të zyrtarëve të lartë.

Tashmë, një nga çështjet që mbetet për t’u provuar është nëse dy vilat e regjistruara në emër të ish-futbollistit janë blerë me burime të ligjshme financiare të tij apo përfaqësojnë pasuri të përfituara në mënyrë të paligjshme nga Balluku, përmes favorizimeve në tenderë publikë.

SPAK duhet të provojë jo vetëm pronësinë faktike të pasurive, por edhe lidhjen e mundshme mes tyre dhe veprave penale të dyshuara. Komunikimi i akuzave nuk përbën vendim fajësie dhe përgjegjësia penale e personave të përfshirë mbetet për t’u përcaktuar nga gjykata.