Menjëherë pas ditës së djeshme ku Rama bëri një deklaratë të papritur ose të ‘pa menduar’ nga foltorja e Kuvendit kur mori atributet e zëdhënësit të qeverisë amerikane, duke paralajmëruar vendime “non grata”, sot u tërhoq nga kjo deklaratë duke mohuar atë që tha 24 orë më parë.
Por pas tërheqjes së tij nga ajo që tha, gazetari Klodian Tomorri ka ironizuar këtë prapakthehu të Edi Ramës.
Përmes një postimi në rrjetet sociale me doza të forta tallje Tomorri shkruan se Rama nuk është më i përkëdheluri i amerikanëve prandaj dhe mohoi atë që tha dje.
“Na doli byreku me gjizë nga hundët. Populli me urtësinë e tij të madhe ka një shprehje për këtë situate; Ndalu Bek se ka hendek. Kur Beku nuk ndalet e rrahin tek te ndenjurat pam e pam. Ka ndryshuar muzika tani. Nuk ka më përkëdhelje. Ështe më mirë ai varianti i amendamentit të pestë. Na mbeti okllaia në dorë tani“, shkruan Tomorri.
Kujtojmë se pas deklaratës së Ramës, reagoi ambasada amerikane kur u pyet për një koment lidhur me qëndrimet e tij.
“Shikoni, thuajse çdo javë, dakord, jo çdo javë, por çdo muaj, shoh një artikull apo ndonjë gazetar që thotë: e di kush është personi tjetër që do shpallet; do të ketë përcaktime. Me gjithë respektin, them se ky është një proces shumë konfidencial dhe do të habitesha vërtet shumë nëse deklaratat e tyre do të bazoheshin në informacion faktik, të besueshëm”, kishte deklaruar ambasadorja Kim.
Gjithashtu kujotjmë se pas qëndrimit të djeshëm të ambasadores amerikane, kryeministri Rama duket se ka bërë sot një hap pas, teksa ka thënë se nuk kishte folur për persona të tjerë që do të shpalleshin non grata.
“Nuk kam paralajmëruar asnjë nongrata! Thjesht kam kujtuar se politika e amerikane nuk është muhabet leku, gjize dhe byreku siç e bëjnë nongratat e Tiranës, po qasje strategjike që as varet as ndryshon nga retë në pantallonat e gjelave të katundit tonë politik! Normal që vazhdon”, shkruan sot Rama në twitter.
