Komisioni për Punën, Çështjet Sociale dhe Shëndetësinë është duke shqyrtuar ndryshimet e propozuara nga Qeveria përmes një akti normativ, në ligjin “Për Sigurimet Shoqërore”.
Aktin normativ nr. 33, datë 11.12.20120 “Për një shtesë në ligjin nr. 7703, datë 11.5.1993, “Për sigurimet shoqërore në Republikën e Shqipërisë”, është miratuar disa ditë më parë edhe në Komisionin e Ekonomisë dhe Financave.
Ky ndryshim parashikon se në rast të “vrasjeve aksidentale” nga Policia të një personi, familja merr pension të posaçëm.
“Ndryshimi me akt normativ ka si qëllim dhënien e një ndihme, me karakter të përhershëm, familjes së personit që humb jetën aksidentalisht si rezultat i veprimeve që një punonjës i organeve ligjzbatuese ka kryer gjatë ushtrimit të detyrës”, thuhet ndër të tjera në ligjin e miratuar nga Komisioni i Ekonomisë.
Ky ligj mori shkas nga vrasja e 25 vjeçarit Klodian Rasha, nga një efektiv policie, më datë 8 dhjetor.
“Familja, e cila ka humbur aksidentalisht pjesëtarë të saj, si pasojë e veprimeve të kryera gjatë ushtrimit të detyrës nga punonjës të organeve ligjzbatuese, përfiton trajtim të veçantë financiar deri në masën e tetëfishit të pensionit social. Trajtimi i veçantë financiar dhe anëtari që përfiton në emër të familjes, përcaktohet me vendim individual të Këshillit të Ministrave dhe financohet nga buxheti i shtetit.
Sipas përcaktimit të mësipërm, familja e të ndjerit përfiton trajtim financiar në masën e tetëfishit të pensionit social (afërsisht 61 000 lekë në muaj) dhe është mbi nivelin e pagës mesatare duke kompensuar mungesën e të ardhurave për familjen nga humbja e jetës”, thuhet ndër të tjera në Aktin Normativ.
Pensioni social në vendin tonë është 7674 lekë. Në disa deklarata publike, familja e Klodian Rashës ka deklaruar se nuk kërkon mëshirë dhe para, por drejtësi për djalin e vrarë.
Në vendimin e Këshillit të Ministrave të botuar edhe në Fletore Zyrtare bëhet me dije se trajtimi financiar për familjen Rasha i paguhet kryefamijarit Qazim Osman Rasha
/GazetaReforma.com/
