Shqipëria përballet me një nevojë urgjente për të përmirësuar financimin dhe shpërndarjen e burimeve për sektorin e arsimit, sipas një analize të realizuar nga UNESCO.
Raporti thekson se financimet për arsimin kanë pasur një rënie të dukshme gjatë dekadës, duke ndikuar në cilësinë e arsimit dhe menaxhimin e sektorit. Shpenzimet për arsimin janë ulur në krahasim me PBB-në, duke kaluar nga 12% e buxhetit në vitin 2010 në 9.8% në vitin 2021.
Kjo ulje ka sjellë një rritje të kostos për nxënës dhe ka theksuar mungesën e një shpërndarjeje efikase të burimeve.
Pavarësisht rritjes së të ardhurave të qeverisë në 28% të PBB-së në vitin 2022, shpenzimet për arsimin mbeten të ulëta, duke arritur në 59.1 miliardë lekë në 2021, krahasuar me nivelin e vendeve të tjera të Ballkanit.
Raporti gjithashtu tregon se paga e mësuesve është shumë më e ulët se profesione të tjera dhe se kostoja e arsimit për nxënës është e lartë, veçanërisht për shkak të rënies së numrit të nxënësve.
Përveç kësaj, decentralizimi i procesit të arsimit, i nisur në 2015, ka krijuar sfida menaxheriale, duke ndarë përgjegjësitë mes Ministrisë së Arsimit dhe qeverive vendore.
Kjo ka bërë që menaxhimi i shkollave të mos funksionojë siç duhet, duke përkeqësuar më tej problemet në sektorin arsimor./ Monitor
