Presidenti i Kosovës, Hashim Thaçi dhe ai i Serbisë, Aleksandër Vuçiç, janë takuar ditën e sotme në Shtëpinë e Bardhë.
Sikundër mund të imagjinohet, ndërmjetësi i takimit ishte Richard Grenell, i dërguar i posaçëm i presidentit Trump për bisedimet Kosovë-Serbi dhe këshilltarit për Siguri Kombëtare, Robert O’Brien.
Pas takimit Thaçi me anë të një statusi në Facebook shkroi se:
“Kosova është e bekuar me mbështetjen e Amerikës dhe Presidentit Trump. Tani jam rrugës për në Kosovë. Pres që menjëherë, të mërkurën apo të enjten, të më mundësohet raportimi në Kuvendin e Republikës së Kosovës, për t’i njoftuar deputetët dhe qytetarët e Kosovës për takimet në Uashington dhe më specifikisht për takimin e sotëm. Duke qëndruar të bashkuara institucionet, partitë politike dhe qytetarët, Kosova do të jetë edhe më e fortë. SHBA është shpresa dhe besimi ynë. Jemi mirënjohës përjetë!”, shkroi ai.
Po ashtu, kreu i shtetit të Kosovës dha një intervistë për Zërin e Amerikës, ku u shpreh se takimi u mbajt “duke dëshmuar vullnetin e mirë, pa ndonjë të veçantë nga takimi, vullnetin dhe simbolikën e fqinjësisë së mirë dhe domosdoshmërinë e arritjes së një marrëveshje përfundimtare që nënkupton paqen dhe stabilitetin për Kosovën, Serbinë por edhe tërë Ballkanin Perëndimor. Është jashtëzakonisht inkurajues roli udhëheqës që po dëshmon ambasadori Grenell dhe lidershipi i presidenti Trump në këtë drejtim”.
Më tej, presidenti Thaçi cilësoi se mesazhi i këtij takimi është i veçantë, pasi “SHBA po rikthehen në pozicionin që e ka pasur atë të përcaktimit të agjendave paqësore dhe të perspektivës euro – atlantike për tërë Ballkanin Perëndimor”.
Sipas tij, takimi i sotëm është i pakrahasueshme me takimet që kanë ndodhur kudo në botë mes shtetit të Kosovës dhe Serbisë, sepse është zhvilluar në Shtëpinë e Bardhë dhe me ndërmjetësimin amerikan.
Prej javësh, zyrtarët amerikanë po i kërkojnë Kosovës që të heqë tarifat e vendosura në nëntor të vitit 2018 për mallrat serbe, ndërsa Beogradit i kanë kërkuar t’i jap fund fushatës për tërheqjen e njohjeve të pavarësisë së Kosovës.
Në këtë kuadër Thaçi tha se Kosova duhet të krijojë rrethana lehtësuese për komunitetin ndërkombëtar dhe për vetveten dhe shfaqi besimin se institucionet e Kosovës do të marrin vendime të përgjegjshme.
“Kokëfortësia e çon Kosovën vetëm prapa dhe e stagnon zhvillimin e Kosovës, ndërsa vendimet e mençura, kohezive e të koordinuara me Shtetet e Bashkuara janë ato që e çojmë vendin përpara”.
Deri tani, me ndërmjetësimin e SHBA, Kosova dhe Serbia kanë nënshkruar dy marrëveshje për vendosjen e linjës ajrore, asaj hekurudhore dhe ndërtimin e autostradave ndërmjet të dyja vendeve.
Ndërkohë, kryeministri Albin Kurti ka hequr taksën për 3 muaj, duke ftuar Serbinë të njohë Pavarësinë e Kosovës, pasi në të kundërt taksa do rikthehej.
Pasi presioni arriti kulmin, i dërguari i SHBA realizon qëllimin. Kurti heq taksën ndaj Serbisë
