Tragjedi në futbollin spanjoll/ Goditet me gju nga portieri gjatë ndeshjes, ndërron jetë sulmuesi 30-vjeçar i Tenerife-s

Një tragjedi ka tronditur futbollin spanjoll. Sulmuesi i Tenerife-s, Jesús de Miguel Alameda, ka ndërruar jetë në moshën 30-vjeçare, pasi pësoi një arrest kardiorespirator pas një përplasjeje të fortë me portierin kundërshtar gjatë ndeshjes kundër Andorrës.

Ngjarja e rëndë ndodhi më 2 nëntor 2026, në minutën e 96-të të takimit Tenerife–Andorra, kur rezultati ishte 2-2. De Miguel po vraponte drejt një topi të gjatë, ndërsa portieri kundërshtar, Jesús Owono, doli nga porta për ta larguar.

Gjatë përplasjes, gjuri i portierit goditi pjesën e sipërme të trupit të sulmuesit 30-vjeçar, i cili u rrëzua pa ndjenja në fushën e lojës.

Momentet që pasuan ishin dramatike. Stafet mjekësore ndërhynë menjëherë, pasi futbollisti pësoi arrest kardiorespirator. Mjekët arritën t’i rikthenin pulsin gjatë transportimit me ambulancë drejt Spitalit Universitar Nuestra Señora de Candelaria, por ai nuk arriti të rifitonte vetëdijen.

Fillimisht, gjendja e tij u raportua si e rëndë, por e stabilizuar. Megjithatë, rreth orës 05:00 të mëngjesit të 3 nëntorit, klubi njoftoi një përkeqësim të rëndë neurologjik.

Pavarësisht përpjekjeve të mjekëve për t’i shpëtuar jetën, Jesús de Miguel ndërroi jetë rreth orës 08:00, duke lënë në zi familjen, bashkëlojtarët dhe futbollin spanjoll.

Pas përplasjes, portieri i Andorrës u ndëshkua me karton të kuq, ndërsa ndeshja u ndërpre.

Jesús de Miguel Alameda kishte lindur më 21 shtator 1996 në Madrid. Gjatë karrierës së tij kishte luajtur për Castellón, Unionistas de Salamanca, Navalcarnero dhe Fuenlabrada, përpara se t’i bashkohej Tenerife-s në vitin 2025. Sezonin e kaluar kishte realizuar 11 gola.

Vdekja e tij ka shkaktuar reagime të shumta në botën e futbollit. Federata Spanjolle e Futbollit vendosi shtyrjen e ndeshjeve të së martës, ndërsa UEFA njoftoi mbajtjen e një minute heshtjeje përpara takimeve europiane të kësaj jave.

Klube të mëdha si Real Madrid dhe Barcelona, si dhe ish-futbollisti Gerard Piqué, shprehën ngushëllimet për humbjen tragjike.

Një ndeshje futbolli që duhej të përfundonte me vërshëllimën e fundit të arbitrit, u kthye në tragjedi, duke i marrë jetën një futbollisti vetëm 30 vjeç.