Qeveria vazhdon të eleminojë godina, të cilat deklarohen që janë jashtë funksionit dhe me dëmtime nga tërmeti i 26 nëntorit 2019.
Së fundmi godina 7-katëshe, kur dikur funksiononte Agjencia Telegrafike Shqiptare ka nisur të shembet. Instituti i Ndërtimit publikoi një raport ku thuhet se godina 7-katëshe është dëmtuar nga tërmeti i 26 nëntorit.
Godina në fjalë është projektuar nga ish-arkitekti i njohur Maks Velo në vitin 1976. Në vitin 2007, godina mori statusin “Monument kulture i kategorisë së dytë” për vlerat e mëdha historike dhe arkitektonike. Ajo kishte të ndërtuar fasadën me xham.
Që në vitin 2020, 1 vit pas tërmetit, është marre vendimi në Këshillin Bashkiak të Tiranës për prishjen. Në truallin ku ndodhet objekti ekzistues, do të ndërtohet objekti i ri, me qellim plotësimin e kërkesave për ambiente shkollore.
E ndodhur në Bulevardin e Ri në Tiranë, Bashkia ka marrë miratimin nga Instituti i Ndërtimit për të vijuar me prishjen. Instituti pretendon se godina është dëmtuar nga tërmeti i nëntorit të vitit 2019, megjithëse , inxhinieri Orhan Sakiqi e hedh poshtë raportin e Institutit të Ndërtimit duke pretenduar se ndërtesa në fjalë nuk ka pësuar asnjë dëmtim.
U raportua po ashtu se ekspertë të huaj që e inspektuan ndërtesën pas tërmetit, thanë se është e sigurt.
Dokumentet tregojnë se ndërtesa është pjesë e një tenderi prej 30 Milionë eurosh dhe është përfshirë në një listë prej 14 objektesh arsimore të cilat do të ndërtohen në Tiranë si pjesë e planit të rindërtimit. Problemi është se ndërtesa nuk do të përdoret si një objekt arsimor. Sipas planit të projektimit, do të ndërtohet një strukturë për zyrat e administratës publike.
Kompanitë që e kanë marrë tenderin janë “Fusha SHA” e ndërtuesit Petrit Fusha, dhe “Edil-Al”.
Ajo që evidentohet është një skemë që përsëritet, e cila përdor si motiv pasojat që ka lënë tërmeti i 26-nëntorit. Rrjedhimisht pasi godina shembet, vendoset si do të përdoret trualli, që mund të jetë ndërtimi i një pallati ose rindërtimi i asaj çfarë ekzistonte.
“Gazeta Reforma” ka denoncuar reste ku mes kompanive që konkurojnë për një tender përkatës zhvillohet një garë jo e drejtë dhe në këto raste favorizohen klientë të bashkisë.
Në fakt, besohet se projekti në fjalë do të mbulojë një hapësirë deri në 2000 metra katrorë, por projekti ATSH mbulon vetëm 225 metra katrorë, duke rritur frikën se prona të tjera përreth do të shkatërrohen po ashtu.
Banorët kanë frikë se prishja e ndërtesës së Maks Velos do të përfshijë po ashtu edhe një ndërtesë në të majtë të saj, për t’i hapur rrugën një kulle 30 katëshe.
