Skandali i “Pandora Papers” që ka përfshirë politikanë të nivelit të lartë në të gjithë botën, ka nxjerrë se në këtë rrjetë janë të përfshira edhe 13 kompani shqiptare dhe një politikan emri i të cilit ende nuk është bërë publik.
Sipas dokumenteve të siguruar nga Birn, kompania e konsulencës “AL Energy Transmission LTD “e cila është themeluar në vitin 2013, ka si administrator biznesmenin shqiptar Vasil Kallupi.
Të dhënat që janë publikuar së fundmi duket se kanë vënë në lëvizje edhe SPAK.
Mbrëmjen e sotme Besar Likmeta, gazetari i “Birn” i ftuar në emisionin “Open” ka treguar ndër të tjera se ka pasur një komunikim me kreun e SPAK. Gjithashtu ai ka pohuar se i ka dhënë kontaktet e organizatës por asnjë dokument. Likmetaj ka pohuar se nga të dhënat që ka publikuar “Birn” ka mjaft indicie për të nisur hetimet ndaj biznesmenit, Vasil Kallupi.
Likmeta: Kam pasur një telefonatë me Arben Krajën. I kam dhënë kontaktet e organizatës. Nuk është e natyrës e gazetarit që të ndajë dokumente me institucione. Zbatimi i ligjit është detyrë e prokurorisë kur ka publikim të të dhënave kur ka dyshime. Është për tu parë se cfarë do të prodhojë organi i akuzës.
Pyetje: Është e mundur të zhvillohet një hetim?
Likmeta: Dhe për të dhënat që kemi publikuar, besoj se ka indicie për të nisur hetimet. Për gazetarët kërkohet dhe punë ekstra, edhe në rastin e dyshimeve. Nuk mjafton thjesht ta marrësh një dokument dhe ta bësh publik.
Kujtojmë edhe një herë se nga dokumentet e publikuar rezulton i përfshirë në këtë skandal edhe një politikan shqiptar. Likmetaj ka pohuar mbrëmjen e sotme se është i përfshirë një politikan shqiptar në një aktivitet, por ende nuk dihet në qoftë se ky aktivitet është i ligjshëm.
Likmeti: Mund të them që është një person i lidhur me një politikan ose një politikan. Lidhjet tregojnë jo gjithmonë se ka aktivitet të jashtëligjshëm. Nuk e dimë ose kërkojmë më shumë informacion. Nuk mund të arrijmë në përfundimin se është i paligjshëm apo jo.
Abilekaj: Na ndihmon deklarimi i pasurisë.
Likmeti: Nëse do ishte aq e thjeshtë, do e kishim publikuar.
