Koncesioni i shumëpërfolur i Porto Romanos është bërë shkak i debateve në Partinë Socialiste, pas deklaratës së ish-ministrit të Jashtëm Ditmir Bushati, i cili i bënte thirrje kolegëve të tij që të distancoheshin nga oligarkët dhe të mendonin për popullin dhe të ardhmen e fëmijëve (lexo këtu).
Deklaratat e tij u mbështetën dhe nga ish-ministri i Shëndetësisë Ilir Beqja, i cili së fundmi në emisionin “Kjo Javë” ka argumentuar vendimin e tij për të abstenuar në votimin për koncesionin.
“Erdhi një shtesë kontrate për një koncesion të dhënë në 2015, për një port hidrokarburesh, parashtresa ishte për nevoja të ndërtimi, sipërmarrësi ka bërë investime më shumë, rezulton që ku investim mund të shfrytëzohet për përpunim mallrash të tjerë. Në bazë të kësaj sipërmarrësi ka bërë një kërkesë dhe ministria e ka pranuar pa i kërkuar në këmbim dicka tjetër. Në komision hodha një ide, po ajo është cështje e ministrisë, propozova nga porti te hekurudha të bëhej edhe ky segment. Ndaj kam abstenuar.”- u shpreh Beqja, duke shtuar më tej se sipas tij, kjo nuk është një çështje oligarkësh, sikurse deklaroi Bushati.
Mirëpo teksa tashmë Beqja i kërkon informacion për këtë çështje Ministrisë së Infrastrukturës dhe nuk arrin të marrë përgjigje, duket se ka harruar se vetëm pak vite më parë, ishte pikërisht a që refuzonte të jepte përgjigje për koncesionet skandaloze të sterilizimit dhe checkup-it, për të cilat ka marrë dhe padi (lexo këtu).
Kështu, ish-ministrit i duhet të shohë nga karrigia e deputetit sesi kolegët e tij në pozicione drejtuese firmosin pa dhënë hesap për koncesione të ngjashme me të tijat, por që tashmë Beqjës i duken të dyshimta.
Largimi nga drejtimi i ministrive dhe rikthimi si deputet duket se ka ngjallur vlerat e moralit tek ish-ministrat, por a do të jetë kjo gjithashtu e emrave të tjerë drejtues që sot vijojnë punën të pashqetësuar?
Mbetet për t’u parë.
