Drejtuesi i SPAK, Altin Dumani, deklaroi se askush nuk do të shpëtojë nga hetimet për lidhjet me krimin, përfshirë edhe agjentë të Byrosë Kombëtare të Hetimit dhe prokurorë të SPAK.
Në bisedat e bandës “Çela-Roka” ka dalë edhe ish-rektori i Universitetit të Elbasanit, Skënder Topi, i cili dyshohet për përfshirje në emërime pedagogësh, dhënie diplomash false dhe tendera për kompani të lidhura me anëtarët e kësaj bande.
Në biseda, del premtimi që ish-rektori Skënder Topi, u ka bërë dy vëllezërve kriminelë Xhino e Marsel Roka, për t’u dhënë tenderin e ruajtjes së universitetit “Aleksandër Xhuvani” të Elbasanit me policinë private “UEVI-2015 Sh.p.k”.
Kjo kompani është në pronësi të Fatbardha Roka, nënës së Xhino dhe Marsel Roka, të cilët janë arrestuar si anëtarë të bandës “Çela-Fetahu”.
Sipas informacionit të Buletinit të Prokurimeve Publike dhe pagesave të Thesarit të Shtetit, rezulton se ish-rektori Skënder Topi ka dhënë tenderin për sigurimin e universitetit të Elbasanit për kompaninë “UEVI-2015 Sh.p.k” që ka lidhje me familjen Roka, me kontratë të nisur në qershor 2017 dhe të vlefshme deri në qershor 2026.
Në komunikimet mes ish-rektorit Skënder Topi dhe Suel Çelës, është arritur një marrëveshje për emërimin e vajzës së ish-gjyqtares Pajtime Fetahu si pedagoge me kohë të plotë në universitet. Po ashtu, ish-rektori ka kërkuar që të merren masa ndaj disa pedagogëve që po e shqetësonin.
