1,701 të infektuar dhe 40 viktima- ky është bilanci që ka shkaktuar Coronavirusi deri tani në SHBA.
Kështu, presidenti i Shteteve të Bashkuara të Amerikës Donald Trump në një konferencë për mediat ka shpallur emergjencën kombëtare për marrjen e masave urgjente në frenimin e përhapjes së COVID-19.
Po ashtu, Trump ka deklaruar akordimin e një fondi prej 50 miliardë dollarësh, në ndihmë të autoriteteve mjekësore për të marrë të gjitha masat për përballimin e situatës.
Masa përfshin heqjen e rregullave për sigurimet mjekësore dhe avancimin në ngritjen e spitaleve të reja e gjetjen e kurës sa më parë.
Ndërkohë ditën e sotme u raportua se rregullatorët shëndetësorë amerikanë kanë aprovuar një test për Coronavirusin që do të shpejtojë me 10 herë aftësinë për të testuar pacientët, duke zgjidhur një pengesë serioze në përpjekjet për parandalimin e pandemisë.
SHBA bën hapin e madh në parandalimin e përhapjes së Coronavirusit
Në rang botëror deri tani janë shënuar 5,339 viktima dhe janë regjistruar 144,010 të infektuar në 137 shtete.
Në vendin tonë deri tani ka humbur jetën 1 person dhe janë infektuar 33 të tjerë, teksa edhe Kosova ka raportuar 2 rastet e para me COVID-19.
Autoritetet shëndetësore bëjnë thirrje që personat të cilët mund të kenë qenë të ekspozuar ndaj individëve të dyshuar për COVID-19, duhet që të vetëkarantinohen dhe të monitorojnë shëndetin e tyre për 14 ditë, që nga dita e fundit me kontaktin e mundshëm.
Po ashtu, ata duhet të kërkojnë mbikëqyrje të menjëhershme mjekësore, nëse paraqesin ndonjë nga simptomat, veçanërisht temperaturë, simptoma respiratore si kollë dhe vështirësi në frymëmarrje apo diarre menjëherë të kontaktojnë 127.
Të gjithë qytetarët rekomandohet që të shmangin daljet në publik dhe të qëndrojnë në shtëpi duke respektuar rregullat e higjenës.
