Bashkimi Evropian reagoi menjëherë pas zhbllokimit të emërimeve në Gjykatën Kushtetuese të Shqipërisë. Për bërjen funksionale të Gjykatës Kushtetuese ka folur dhe Komisioneri për Zgjerim i BE-së, Oliver Varhelyi.
“Lajm i shkëlqyeshëm nga Shqipëria! Me emërimin e anëtarit të 6-të nga Presidenti Gjykata Kushtetuese bëhet funksionale. Arritje e rëndësishme për institucionet dhe njerëzit si pjesë e reformës në drejtësi. Kjo plotëson listën e kushteve për mbajtjen e konferencës së parë ndërqeveritare” – shkruan Varhelyi.
Ndërkaq, Ambasadori gjerman e ka quajtur këtë vendim si gur kilometrazhi për shtetin ligjor, u përmbush një kusht qendror për integrimin
Ambasadori gjerman, Peter Zingraf tha se një gjykatë kushtetuese funksionale është kolonë qendrore në ekuilibrin institucional dhe ndarjen e pushteteve në Shqipëri, ndërsa e cilësoi përmbushje të një kushti qendror për integrimin e vendit.
“Zgjedhja e sotme e z. Përparim Kalo si gjyqtar në Gjykatën Kushtetuese është një gur kilometrazhi në rrugën drejt konsolidimit të shtetit ligjor në Shqipëri. Falenderimi im shkon për të gjitha institucionet, që ditët e fundit bashkëpunuan në mënyrë konstruktive në interes të kësaj çështjeje. Një gjykatë kushtetuese funksionale është kolonë qendrore në ekuilibrin institucional dhe ndarjen e pushteteve në Shqipëri. Gëzohem që në këtë mënyrë është përmbushur një kusht qendror prej konkluzioneve të Këshillit të Bashkimit Evropian në mars 2020 për zhvillimin e konferencës së parë të anëtarësimit”, shkruan Zingraf.
/Gazetareforma.com/
