118 ditë protesta, Rama zgjedh sërish talljen me qytetarët: “Pula histerike”, korrupsioni vetëm “llogje”

Protestat kundër qeverisë e ndoqën Edi Ramën deri në New York, por përgjigjja e kryeministrit nuk ishte ndaj akuzave dhe kërkesave të ngritura nga qytetarët. Ai zgjodhi sërish gjuhën e talljes dhe etiketimit, duke i quajtur protestuesit “pula histerike” dhe duke i përshkruar denoncimet për korrupsion si “llogje të pafundme”.

Reagimi vjen në një moment kur protesta kundër qeverisë nuk është më një episod i izoluar. Vetëm një ditë më parë, në Tiranë u zhvillua protesta e 117-të radhazi, ndërsa qytetarët kanë vijuar prej muajsh tubimet dhe kërkesat për largimin e Ramës. Më 25 shtator, protesta u zhvendos edhe përtej Shqipërisë: gjatë qëndrimit të kryeministrit në New York për aktivitetet e Asamblesë së Përgjithshme të OKB-së, një grup shqiptarësh protestoi kundër tij dhe hodhi vezë në drejtimin e tij.

Përballë kësaj situate, Rama reagoi në platformën “X”, duke pretenduar se flamurin shqiptar e ka ngritur “më lart se çka qenë kurrë ndonjëherë në sytë e botës” dhe duke ia atribuar qeverisjes së tij krijimin e një sistemi institucional me aftësi “vetëpastrimi”.

Por më pas gjuha kaloi drejtpërdrejt te protestuesit:

“Këtyre që mbulohen me flamurin kombëtar dhe çarten rrugëve si pula histerike, u them vetëm se atë flamur e kam ngritur më lart se çka qenë kurrë ndonjëherë në sytë e botës.
Kurse atyre që kujtojnë se do më ndalin me baltë, vezë dhe jargë, në misionin tim për ta çuar flamurin tonë në majën e Europës së Bashkuar, u them se nëse për herë të parë në historinë e shtetit shqiptar, kemi një sistem institucional që shfaq aftësi vetëpastrimi, kjo është një arritje e madhe që nuk ka rënë nga qielli po ka ardhur pikërisht si një nga rezultatet e këtij misioni!”

Rama vijon duke e paraqitur funksionimin e institucioneve të drejtësisë si rezultat të qeverisjes së tij dhe duke argumentuar se lufta ndaj korrupsionit tregon pikërisht se Shqipëria nuk është më një vend i zhytur në të.

“Dhe le ta dëgjojnë e ta mbajnë mirë vath në vesh meqë kujtojnë se mposhtem unë dot me ‘bombat çudibërëse’ që amplifikojnë në kupë të qiellit ditë e natë fjalën korrupsion:
Në një vend që është i mbytur në kënetën e korrupsionit, nuk ka luftë frontale e as rezultate konkrete kundër korrupsionit dhe atë vend e kemi jetuar ne, që të gjithë, deri kur unë me partinë time e kthyem rrotën e drejtësisë nga barazia e të gjithëve para ligjit!”

Por reagimi nuk mbyllet me argumentin politik. Kryeministri rikthehet te ironia dhe fyerjet ndaj kundërshtarëve dhe protestuesve.

“Sot Shqipëria nuk është më ai vend e prandaj edhe Bashkimi Europian e çmon gjithnjë e më shumë Shqipërinë për këtë luftë, ndërkohë që pulat histerike të katundit tonë kakarisin e hedhin vezë në ajër për llogari të gjelave tallagjarë të pazarit politik e mediatik, të cilët i gënjen mendja sa një vezë, se do të më ndalin mua me llogjet e pafundme për korrupsionin që po luftohet nga vetë sistemi që po ndërtojmë, apo me sharjet e mallkimet folklorike si të këtij sqepit bashkëngjitur, që e shkruan shqipen me këmbët e pulës”.

Kjo është pikërisht pika ku reagimi i Ramës bëhet politikisht domethënës. Kryeministri mund të kundërshtojë akuzat, të mbrojë bilancin e qeverisë dhe të dënojë hedhjen e vezëve. Por kur protesta që vazhdon prej muajsh reduktohet në “pula histerike”, “kakarisje” dhe “llogje”, debati zhvendoset nga përmbajtja e pakënaqësisë qytetare te përqeshja e atyre që protestojnë.

Nuk është hera e parë që Rama përdor etiketime ndaj kritikëve dhe kundërshtarëve. Edhe më herët, gjuha e tij publike ka përfshirë epitete dhe ironi në vend të një debati të drejtpërdrejtë mbi përgjegjësinë politike.

Por 118 ditë protesta nuk zhduken duke i quajtur protestuesit “pula”. As akuzat për korrupsion nuk marrin përgjigje duke i quajtur “llogje”. Ato mund të kundërshtohen me fakte, transparencë dhe llogaridhënie.

Dhe pikërisht këtu mbetet pyetja që Rama nuk e adreson në reagimin e tij: përse, pas më shumë se tre muajsh protestash, përgjigjja ndaj qytetarëve vazhdon të jetë përqeshja e tyre dhe jo përballja me arsyet që i kanë nxjerrë në rrugë?