Nga viktimë në të kërkuar/ Eduard Kuçi mohoi rrahjen nga Joz Marku, Policia e kërkon për moskallëzim krimi

Një kthesë e re ka marrë çështja që çoi në pranga këngëtarin Jozefin Marku dhe shoferin e tij, Kristjan Nikolli. Eduard Kuçi, i identifikuar si viktima e sulmit, tashmë është vendosur në kërkim policor dhe ndaj tij është ngritur akuza e moskallëzimit të krimit.

Detajet u bënë publike nga gazetarja Anila Hoxha gjatë emisionit “Breaking” në Top News. Sipas saj, Kuçi nuk e ka denoncuar sulmin dhe, kur është paraqitur në polici, ka mohuar se ishte rrahur, duke deklaruar se bëhej fjalë vetëm për një konflikt të thjeshtë të shkaktuar nga bllokimi i rrugës me makinë.

“Eduard Kuçi nuk e ka kallëzuar krimin, në polici ka thënë se ka qenë një konflikt i thjeshtë për shkak të bllokimit të rrugës me makinë.

Më pas policia ka konfirmuar dhe ka bërë verifikimet e nevojshme, ka ngritur akuzën e moskallëzimit të krimit për Kuçin dhe e ka vënë në kërkim policor. Më pas, Marku është thirrur në polici, por ai nuk ka pranuar. Pas arrestimit ka thënë se është mërzitur që Kuçi e ka ofenduar në rrjetet sociale.

Prokuroria ka ngritur disa akuza ndaj tij dhe Kristjan Nikolli. Kuçi nuk ka bërë denoncim dhe është një hetim i nisur nga ana e policisë. Kuçi është në kërkim policor, që ndryshon nga kërkimi nga ana e gjykatës apo prokurorisë. Ai kërkohet të japë sqarime për ngjarjen.

Prokurori ka kërkuar akt-ekspertimi për të kuptuar nëse ka dëme trupore ndaj viktimës së sulmit. Po hetohet gjithashtu për përdorimin e simboleve të policisë së shtetit. Pika më e fortë e mbrojtjes së Markut do të jetë fakti që Kuçi nuk ka bërë denoncim”, u shpreh Anila Hoxha.

Ndërkohë, prokurori i çështjes, Françesk Galaj, ka kërkuar masën e sigurisë “arrest me burg” për Jozefin Markun dhe Kristjan Nikollin. Ende nuk është caktuar ora e seancës për dy të arrestuarit.

Hetimet vijojnë për të përcaktuar rrethanat e plota të ngjarjes dhe rolin e secilit person të përfshirë. Prokuroria ka kërkuar edhe akt-ekspertimin për të përcaktuar nëse Kuçi ka pësuar dëmtime trupore, ndërsa pjesë e hetimeve është edhe përdorimi i simboleve të Policisë së Shtetit.

Fakti që Kuçi nuk ka bërë kallëzim pritet të jetë një prej pikave kryesore të mbrojtjes së Markut. Ndërkohë, kërkimi policor ndaj Kuçit nuk është i njëjtë me një shpallje në kërkim nga gjykata apo prokuroria; ai kërkohet nga Policia për të dhënë sqarime lidhur me ngjarjen.