Është ndarë nga jeta në moshën 78-vjeçare senatori zviceran, Dick Marty. Lajmin për humbjen e tij e ka bërë të ditur gazeta zvicerano-italiane, “Corriere del Ticino”.
Mësohet se trupi i pajetë i Martyt është gjetur në shtëpinë e tij, këhstu ka konfirmuar edhe Partia Radikale e qendrës së djathtë, ku ai ishte pjesë.
Marty u bë i njohur kur u emërua anëtar i Këshillit të Evropës dhe i Komisionit të OSBE-së për të Drejtat e Njeriut. Ndërsa për shqiptarët u bë i njohur nga raporti që publikoi ai për Kosovën, në vitin 2011, pasi pretendonte se krerët e UÇK-së kanë kryer krime kundër njerëzimit gjatë luftës së fundit në Kosovë, specifikisht trafikim të dyshuar të organeve.
Si pasojë e raportit të tij u themelua Gjykata Speciale në Hagë nga Kuvendi i Kosovës disa vjet më vonë. Në Hagë po akuzohen ish-eprorët e UÇK-së për krime lufte e krime kundër njerëzimit.
Ai u zgjodh në asamblenë parlamentare të Këshillit të Evropës në vitin 1999 dhe kryesoi Komisionin për Çështjet Ligjore dhe të Drejtat e Njeriut nga viti 2005 deri në 2008. Ai doli në pension në vitin 2011.
