Bëhet me dije nga informacionet e fundit se sapo ka përfunduar takimi i Aleksandër Vuçiçit me të dërguarin e SHBA-së për Ballkanin Perëndimor Gabriel Escobar në Bruksel. Paralelisht kreu i qeverisë së Kosovës Albin Kurti ka nisur takimin me shefin e diplomacisë së BE-së Josep Borrell dhe përfaqësuesin special, Miroslav Lajçak.
Referuar axhendës, pas përfundimit të takimit të Kurtit me zyrtarët evropianë, radhën e ka Aleksandër Vuçiç të bisedojë me ta. Ndërsa në fund Borrell do të dalë me një konferencë për mediat ku do të informojë mbi përfundimet e arritura gjatë taikmit me kreun e qeverisë së Kosovës dhe liderit serb. Sipas planit, nëse nuk arrihet marrëveshje mes Vuçiçit dhe Kurtit, do të mbahen sërish takime dypalëshe të liderëve për përfaqësuesit evropianë.
Kujtojmë se në Bruksel ndodhet edhe i dërguari i posaçëm i SHBA-së për Ballkanin Perëndimor, Gabriel Escobar, i cili do të duhej t’i takonte palët veç e veç, përpara takimit të përbashkët.
Gjithashtu blloku evropian e konsideron takimin e sotëm mes Kurtit dhe Vuçiçit – të gjashtin me radhë – si më të rëndësishmin, sepse kësaj here, sipas burimeve në Bruksel, nuk do të ketë diskutime për menaxhimin e krizave, por për një dinamikë të re të raporteve mes tyre.
