Banorët e Bërxullës kanë bllokuar rrugën në shenjë proteste, pasi pronat e tyre preken nga ndërtimi i aksit Thumanë-Kashar. Policia ka tentuar që t’i largojë në mënyrë që të lirohet rruga që të çon në drejtim të Rinasit. Një grua qëndron e vetme në mes të rrugës, duke krijuar trafik të rënduar.
Ajo shprehet se nuk duron dot më nga padrejtësitë që iu janë bërë. E moshuara thekson se do të çohet vetëm kur të vijë Tonin Vocaj.
Në një moment, një prej banoreve ka shtyrë një polic, i cili u rrëzua.
Gruaja u shpreh se nuk e ka prekur, ndërsa Polici u çua në këmbë, duke mos marrë masa ndaj veprimit.
‘Kam duru shumë, nuk duroj dot më. Ku është shteti këtu. Nuk e hap rrugën. Do cohem kur të vij Tonin Vocaj, e kam marrë ne telefon, kur të vij ai do çohem. Mirë që më shkatërron tokën dhe shpinë, më thot mos dil ku.‘-thotë gruaja e cila vijon të qëndrojë prej disa minutash në tokë.
Banorët e Bërxullës prej ditësh vijojnë protestat duke kërkuar të marrin kompensimin e pronave që preken nga projekti i rrugës Thumanë-Kashar. Ata paralajmërojnë bllokimin e rrugës që të çon drejt Rinasit, por kjo tentativë e tyre ka hasur në rezistencën e policisë.
