Ditën e sotme bëhet e ditur se policia e Kurbinit ka vënë në pranga shtetasin Kol Mhillaj, banues në Milot pasi qarkullonte me armë zjari të tipit kallashnikov.
Banorët kanë denocuar këtë shtetas pasi kohët e fundit ka shkaktuar panik dhe janë ndjerë të kërcënuar duke e parë të lëvizë me armë zjarri.
Gjithashtu pasi ka konstatuar prezencën e policisë është munduar të fsheh armën e cila ishte me 24 fishekë gati për qitje.
Materialet proceduriale i kaluan Prokurorisë së rrethit Kurbin.
Njoftimi i policisë:
Kurbin/Lëvizte me armë zjarri kallashnikov në rrugicat e lagjes ku banonte, duke krijuar panik te banorët, Policia ndërhyn në kohë duke vënë në pranga shtetasin që qarkullonte me armë.
Sekuestrohet 1 armë zjarri kallashnikov me krehër me fishekë në të. Shërbimet e Komisariatit të Policisë Kurbin, menjëherë pas marrjes së denoncimit për një shtetas që lëvizte i armatosur me armë zjarri, në lagjen ku banonte, duke krijuar panik te banorët, kanë organizuar punën dhe në kuadër të operacionit policor të koduar “Fqinji”, kanë arrestuar në flagrancë shtetasin K. M., banues në Milot, për veprën penale “Mbajtja pa leje dhe prodhimi i armëve, armëve shpërthyese dhe i municionit”.
Ky shtetas u kap në flagrancë në rrugicën e lagjes ku banonte, teksa mbante me vete, një armë zjarri kallashnikov me krehër me 24 fishekë në të. Shtetasi K. M., sapo ka parë punonjësit e Policisë, e ka hedhur armën, me qëllim fshehjen e saj. Ndërhyrja e menjëhershme e shërbimeve të Policisë, bëri të mundur gjetjen dhe sekuestrimin në cilësinë e provës materiale, të armës së zjarrit kallashnikov dhe municionit luftarak. Materialet procedurale i kaluan Prokurorisë pranë Gjykatës së Rrethit Gjyqësor Kurbin, për veprime të mëtejshme.
