Ditën e sotme, Gjykata e Lartë zgjodhi anëtarin e 9-të Gjykatës Kushtetuese. Holta Zaçaj do zërë vendin e zv. kryetares Vitore Tushe. Pas këtij vendimi Gjykata Kushtetuese ka nisur gjithashtu fillimin e procedurave për zgjedhjen e kryetarit të këtij institucioni.
Vendimi për nisjes e procedurave u mor gjatë mbledhjes së sotme të gjyqtarëve. Sipas njoftimit, kërkesa për shprehje interesi nga gjyqtarët mund të paraqitet jo më vonë se 7 ditë nga fillimi i detyrës së gjyqtares së zgjedhur nga Mbledhja e Posaçme e Gjykatës së Lartë në datën 16.01.2023.
“Kërkesa për shprehje interesi nga gjyqtarët mund të paraqitet jo më vonë se 7 ditë nga fillimi i detyrës së gjyqtares së zgjedhur nga Mbledhja e Posaçme e Gjykatës së Lartë”, thuhet në njoftimin e Kushtetueses.
VENDIMET E PLOTA NË MBLEDHJE:
Procedura për caktimin e kolegjeve për vitin 2023 të zhvillohet pas fillimit të detyrës së gjyqtares së zgjedhur nga Mbledhja e Posaçme e Gjykatës së Lartë në datën 16.01.2023.
Vijimin e funksionimit të kolegjeve sipas përbërjes ekzistuese.
Ndryshimi i vendimit nr. 19, datë 15.12.2022 të Mbledhjes së Gjyqtarëve të Gjykatës Kushtetuese për përbërjen e kolegjit numër 2 si më poshtë:
Kolegji 2: Kryesuese Sonila Bejtja
Anëtar Genti Ibrahimi
Anëtare Marjana Semini
Fillimin e procedurave për zgjedhjen e Kryetarit të Gjykatës Kushtetuese.
Kërkesa për shprehje interesi nga gjyqtarët mund të paraqitet jo më vonë se 7 ditë nga fillimi i detyrës së gjyqtares së zgjedhur nga Mbledhja e Posaçme e Gjykatës së Lartë në datën 16.01.2023.
Fillimin e procedurave për zgjedhjen e Kryetarit të Gjykatës Kushtetuese.
SI ZGJIDHET KRYETARI I RI?
Kryetari i Gjykatës Kushtetuese zgjidhet me votim të fshehtë, me shumicën e votave të të gjithë gjyqtarëve të Gjykatës Kushtuese, për një periudhë 3-vjeçare me të drejtë rizgjedhjeje vetëm një herë. Seanca për zgjedhjen e Kryetarit drejtohet nga gjyqtari më i vjetër në detyrë. Në rast se ka më shumë se një kandidat dhe gjatë votimit asnjëri prej tyre nuk merr shumicën e parashikuar të votave, bëhet një votim i ri dhe, pas këtij, vijohet me votimin mes kandidatëve që kanë marrë numrin më të madh të votave. Në përfundim të këtij votimi shpallet i zgjedhur kandidati që ka marrë shumicën e votave. Në rast se asnjë nga kandidatët nuk ka marrë shumicën e votave ose votat janë ndarë në mënyrë të barabartë, Kryetari caktohet me short. Procedura e zhvillimit të shortit parashikohet me vendim të Mbledhjes së Gjyqtarëve. Kryetari i zgjedhur njofton Presidentin e Republikës dhe Kryetarin e Kuvendit.
Ditën e sotme Gjykata Kushtetuese u plotësua me 9 anëtarë. Holta Zaçaj do të zëvendësojë Vitore Tushën në Gjykatën Kushtetuese. Në njoftimin e bërë publik nga Gjykata e Lartë bëhet me dije se se Zaçaj mori gjashtë vota bashkë me kandidaten tjetër, Elsa Miho, ndërsa tre vota u shpallën të pavleshme. Sipas rregullit, zgjidhet anëtari që merr tri të pestat e votave të gjyqtarëve të pranishëm, ndërsa në raste që nuk arrihet shumica, kandidati i renditur i pari nga Këshilli i Emërimeve në Drejtësi konsiderohet i zgjedhur.
