Ditën e sotme Prokuroria e Posaçme kundër Korrupsionit dhe Krimit të Organizuar ka nisur verifikimet për pasurinë e të arrestuarve si porositës dhe organizatorë të trafikut të 430 kilogramëve kokainë nga Kolumbia dhe ka nisur shkresa pranë institucioneve të regjistrimit të pasurive të luajtshme dhe paluajtshme.
Pas përmbylljes së fazës së parë të hetimeve për rastin e trafikut ku vuri në pranga Nikolin Gjolenën si financier dhe 9 persona të tjerë, tashmë kërkon të gjurmojë pasuritë e të arrestuarve por edhe të familjarëve të tyre për të zbuluar nëse mund t’i justifikojnë me burime të ligjshme, në të kundërt do t’u konfiskohen.
Lajmi për drogën u publikua fillimisht nga mediat malazeze, pasi në portin e Tivarit prej muajsh 24 ton pleh kimik i përzierë me 430 kilogramë kokainë priste për marrësin. Kur ky i fundit shkoi në port, ndërhyri DEA dhe u bë arrestimi i tij. Më pas u organizua operacioni për prangosjen e personave të tjerë në Shqipëri. Deri më tani janë arrestuar: Zenel Cervanaku, i cili akuzohet se është edhe porositësi i kësaj sasie kokaine; Viktor Çervanaku, ish-kryetari i komunës së Frakullit, djali i tij së bashku me të fejuarën, Denilson Çervenaku dhe Enxhi Ferhati; Klajdi Vrioni (Kodra), 32 vjeç, i dënuar më parë për armëmbajtje pa leje dhe për plagosje të rëndë; Redion Meshi, 22 vjeç; Marildo Rona, Nikolin Gjolena, Julian Malaj dhe Bledar Matoshi. Në kërkim është shpallur kolumbiani Zaimir Rodrigez, i cili dyshohet se kishte ardhur në Shqipëri për të bërë ndarjen e kokainës nga plehu kimik. Në kuadër të këtij operacioni u sekuestruan 15,910 Euro; 3 armë zjarri automatik kallashnikov; 3 armë zjarri të llojit pistoletë; 108 copë fishekë luftarake të kalibrave të ndryshëm; 18 aparate telefonash celulare; 5 automjete; 2 laptop dhe 2 armë gjahu.
