Mëngjesin e sotëm qytetarët në Durrës raportojnë për një shpërthim të fuqishëm. Disa prej tyre raportojnë se janë zgjuar nga shpërthimi që kanë dëgjuar.
Deri më tani raportohet se disa persona ende të paidentifikuar vendosën lëndë plasëse në biznesin e qytetares, Jonida Karaboja. Ngjarja ka ndodhur gjatë mbrëmjes në Durrës. Ishin qytetarët ata të cilët raportuan në media se kishin dëgjuar një shpërthim të fuqishëm. Nga shpërthimi nuk ka persona të lënduar, vetëm dëme materiale. Vetë pronarja e biznesit ka deklaruar se nuk ka konflikte me persona të tjerë e se nuk e di kush mund t’ia ketë bërë këtë gjë.
Policia ka shoqëruar disa persona në polici, të cilët mund të kenë dijeni për shpërthimin që ndodhi në orët e para të mëngjesit. Në biznesin e Jonida Karabojës u vendos lëndë plasëse. Forcat blu sqarojnë se lënda plasëse u vendos në qepenin e butikut, e për pasojë ka vetëm dëme materiale. Policia dhe grupi hetimor po vijojnë punën për të identifikuar dhe kapur autorët.
NJOFTIMI I POLICISË:
Në orët e para të mëngjesit, në lagjen nr. 7, Durrës, në qepenin e një butiku në pronësi të shtetases J. K., ka shpërthyer një sasi e vogël, e dyshuar lënde plasëse. Për pasojë, janë shkaktuar dëme të vogla materiale.
Në ambientet e Komisariatit të Policisë Durrës janë shoqëruar disa shtetas dhe vijon puna intensive nga grupi hetimor, nën drejtimin e Prokurorisë, për sqarimin e rrethanave të ngjarjes, identifikimin dhe kapjen e autorit/ëve.