Zëdhënësi i qeverisë së Kosovës Përparim Kryeziu ka konfirmuar se ditën e nesërme kryeministri Albin Kurti do të udhëtojë drejt Brtukselit për të takuar presidentin serb Aleksandër Vuçiç.
“Kryeministri Kurti udhëton sot për në Bruksel, ndërkaq takimi ndërmjet kryeministrit Kurti dhe z. Vuciq është konfirmuar për nesër, ditë e hënë”, tha Kryeziu.
Fillimisht lajmin e takimin e ka konfirmuar vetë presidenti serb gjatë një interviste ku tha se gjatë pasdites së sotme ose nesër në mëngjes do të niset drejt Brukselit.
“Bisedimet do të fillojnë në mëngjes në orën 8, që do të thotë se ne do të largohemi nga Beogradi në 4, ose 4:30, ose sonte vonë. Unë do të shkoj, jo pse mendoj se mund të bëjmë diçka, por mos t’ju dhënë arsye për të fajësuar Serbinë se nuk deshi të marrë pjesë”, tha Vuçiç.
Albin Kurti dhe Aleksandër Vuçiç janë takuar 3 herë, i fundit më 18 gusht, deri më tani në Bruksel ku në qendër të bisedimeve ka qenë vijimi i dialogut Kosovë-Serbi dhe arritja e një marrëveshje. Ky takim vjen në prag të nisjes së fazës së dytë të vendimit të qeverisë së Kosovës në lidhje me riregjistrimin e targave, që është ajo e gjobave. Në raundin e parë të bisedimeve i pranishëm ishte dhe i dërguari i SHBA-së në Ballkanin Perëndimor, Gabriel Escobar i cili u shpreh se SHBA-të i kushtojnë një vemendje të veçantë dialogut mes dy vendeve si e vetmja zgjidhje për të mos shkuar në konflikte. Joseph Borrell u shpreh besimplotë se dialogu do të japë rezultat dhe se nuk do të jetë e nevojshme që të ketë një ndërhyrje të trupave të KFOR-t që u paralajmërua dhe ditën e djeshme nga shefi i NATO-s, Jens Stoltenberg.
