Mbrëmjen e sotme Kryeministri Edi Rama beson se as Sali Berisha dhe as Lulzim Basha nuk kanë legjitimitet për të drejtuar Partinë Demokratike. Në emisionin “Zonë e Lirë” duke marrë rolin e analistit në media, ai e cilësoi PD-në si “kala” po rrënohet dhe se nuk ka rëndësi se kush do të jetë lideri i ri i demokratëve, pasi të dy kanë braktistur elektoratin e djathtë.
“Pyetja është a mban kalaja, dhe jo kush e mban kalanë, por a do të mbajë kalaja? A do të ketë kala për të mbajtur? Sot është, por ndërkohë që kjo që ndodh rrënon kalanë. Kështu që a do të mbajë kalanë apo gërmadhat e kalasë. Kalanë nuk do ta mbajë asnjëri, por sherri dhe një proces që do të shkojë në degradim të vazhdueshëm. Zyrtarisht nuk ka më rëndësi kush do të jetë kryetar i PD-së, pasi nuk ka legjitimitet nga asnjë palë, është cenuar, sepse e kanë braktisur atë që është bazamenti i lidershipit, qëllimi i përbashkët dhe janë futur në rrugën e marrëzisë duke ndjekur njëri-tjetrin”, tha Rama
Për konfliktin brenda Partisë Demokratike, Rama tha se i intereson në mënyrë cinike që sherri mes kryetarit aktual Lulzim Basha dhe ish-kryeministrit Sali Berisha të vazhdojë, ndërsa nga ana pragmatiste do të donte qetësi.
“Unë mendoj që në mënyrë cinike, Edi Ramës i intereson sherri. Por në mënyrë pragmatike në funksion të asaj që ka nevojë Edi Rama i intereson qetësia, që të ketë të bëjë me një opozitë që mund të flitet, por këto janë të pamundura. Por Edi Rama nuk është me asnjërin”, tha ndër të tjera Edi Rama.
