Ditën e sotme Komisioni i Përkohshëm për Rithemelimin e Partisë Demokratike ka njoftuar të gjithë demokratët se në datën 18 dhjetor, anëtarësia e PD vendos me referendum për shkarkimin e kryedemokratit Lulzim Basha. Në njoftimin e shpërndarë për të gjithë anëtarët e PD-së për Komisionin e Rithemelimit, jepen detaje për takimin e demokratëve.
Komisioni për Rithemelimin e Partisëe Demokratike njofton mbajtjen e referendumit mbi shkarkimin e Lulzim Bashës. Orari i votimit është nga ora 08:00-17:00,”-thuhet në njoftim.
Por si ka përfunduar çështja deri në këtë pikë?
Historia fillon në 9 shtator kur Lulzim Basha pezulloi Sali Berishën, tashmë “non grata” nga Amerika nga grupi parlamentar. Pas vendimit të Bashës, Berisha iu rikthye aktivitetit të tij politik, duke nisur takimet me bazën që i quajti “Foltore”. Më 11 dhjetor, Kuvendi i thirrur nga ish-kryeministri Sali Berisha votoi me 4446 fleta pro shkarkimit të Bashës. Gjithashtu u ngrit edhe një grup Komisioni i Përkohshëm me 29 anëtarët për të nisur të gjitha procedurat e nevojshme.
Pikërisht ky Komision pritet ta marrë në dorë partinë deri më 22 mars 2020 kur do të thirret një Kuvend i ri për të zgjedhur kryedemokratin e ri dhe funksionarët e tjerë. Por Basha nuk e njeh vendimin, duke përjashtuar dje nga një mbledhje nga Këshilli Kombëtar i PD-së, të gjithë mbështetësit e Berishës, duke i zëvendësuar të gjithë anëtarët e Kryesisë. Por kundërpërgjigja e vendimit të Bashës, erdhi sot, me hyrjen në PD të Berishës dhe mbështetësve të tij. Lufta mes palëve ka nisur, por nuk dihet përfundimi…
