Presidenti i Republikës Ilir Meta dhe kryeministri Edi Rama ndodhen në Vlorë për 109-vjetorin e Pavarësisë së Shqipërisë. Meta e Rama kanë marrë pjesë në ceremoninë e ngritjes së flamurit, teksa më pas kanë zhvilluar homazhe dhe kanë vendosur kurora me lule në monumentin e Pavarësisë.
E pranishme ishte dhe kryetarja e Kuvendit Lindita Nikolla, si dhe drejtues lokalë. Disa aktivitete janë parashikuar të mbahen gjatë ditës së sotme me rastin e 28 nëntorit Ditës së Flamurit.
Kujtojmë se pak më herët Kryeministri Edi Rama ka zgjedhur të urojë shqiptarët me disa fotografi të stemës së aeroportit të Vlorës duke njoftuar nisjen e punimeve në këtë kantier.
“Mirëmëngjesi, gëzuar 28 Nëntorin”, shkruan Rama krahas fotove.
Rama është shprehur se do të realizohet ëndrra e kahershme për Aeroportin Ndërkombëtar të Vlorës.
Gjithashtu edhe Presidenti Meta ka uruar 28 nëntorin, festën e Pavarësisë së Shqipërisë me një foto të veçantë. Ai ka publikuar një foto me nipin e Presidentit të ndjerë të Kosovës Ibrahim Rugova, teksa të dy bëjnë me duar simbolin e shqiponjës.
“Të dashur miq,
Së bashku me Lekën, nipin e Presidentit historik të Kosovës, Ibrahim Rugova, ju urojmë të gjithë shqiptarëve kudo ndodhen: Gëzuar Pavarësinë e Shqipërisë, Ditën e Flamurit tonë Kombëtar! 🇦🇱”, shkruan Presidenti Meta.
