Deklarata e bërë ditën e djeshme nga Gazmend Bardhi, Sekretari i Përgjithshëm i Partisë Demokratike ka bërë që mes selisë blu dhe Lëvizjes Sociaslite për Integrim të nisë një luftë e ashpër me akuza e kundërakuza. I ftuar në studion e emisionit ‘Open”, Bardhi deklaroi se Opozita do të gjendej në një pozitë më të favorshme pas zgjedhjeve të 25 prillit nëse LSI-ja do të kishte pasur vullnet për të bashkëpunuar e për tu futur me një listë të përbashkët në zgjedhje.
Ai tha se Partia Demokratike është angazhuar plotësisht, duke theksuar se LSI-së i ishin ofruar 15 mandate të sigurta vetëm për listën e përbashkët, gjë që sipas tij ishte refuzuar me argumentin se ata do të fitonin të vetë 34 mandate. Ai shtoi se nuk ka pasur ‘rritje pazari’ nga partia tjetër për më shumë mandate që të mos jetë pranuar nga Partia Demokratike.
“Gjatë zgjedhjeve ka pasur një mungesë totale vullneti nga LSI për të bashkëpunuar me ne, debati i famshëm për të hyrë në listë të veçantë apo bashkë. PD i ka ofruar 15 mandate, qëndrimi ishte që sipas sondazheve do fitonin 34 mandate në të gjithë territorin e Shqipërisë. Kam pasur një bisedë në zyrën e kryetarit të partisë. Na thanë do i fitojmë vetë dhe nuk do hyjmë bashkë në lista. Dy muaj pasi isha caktuar drejtues politik i qarkut të Elbasanit konkludova se LSI nuk merrte asnjë mandat në Elbasan. Ua thashë, më thanë ne marrim dy dhe luftojmë për të tretin. Nuk ka pasur rritje pazari nga LSI-ja që të knë kërkuar 20 apo 25 mandate dhe që PD-ja të mos e ketë pranuar,”- tha Bardhi.
Kundërshtimi i parë për këtë deklaratë erdhi nga Petrit Vasili. Ky i fundit ndërhyri në studio dhe në një lidhje me Skype tha se në mënyrë absolute nuk ka ndodhur një bisedë e tillë mes PD-së e LSI-së e aq më tepër për premtim mandatesh. Bardhi këmbëngulte që gjithçka kishte ndodhur në zyrën e kryedemorkatit Lulzim Basha e ndoshta jo në prezencë të Vasilit, por ky i fundit foli edhe në emër të kryetares Monika Kryemadhi.
“Në prezencën time dhe të zonjës Kryemadhi nuk ka ndodhur asnjëherë,”- tha Vasili.
Pa u vonuar, erdhi edhe reagimi i vetë Kryemadhit. Në një psotim në profilin e saj në Facebook, Kryemadhi e konsideroi një mashtrim të madh premtimin e mandative, por zbuloi për herë të parë edhe një premtim të bërë nga vetë PD-ja në kohën që u dogjën mandatet. Kryemadhi lë të kuptohet se Partia Demokratike e ka futur ‘në kurth’ LSI-në me premtimin se djegien e mandative do t’i përkrahte kancelarja Angela Merkel e Partia Popullore Evropiane.
“Një pyetje për të gjithë anëtarët e kryesisë së PD: Kur është mbledhur kryesia e PD për t’i propozuar LSI listën e përbashkët? Në cilën ditë dhe orë? Listës së mashtrimit, që për djegien e mandateve do t’i dilte në krah kancelarja Merkel dhe PPE, iu shtua tashmë publikisht edhe kjo e 15 mandateve të ofruara. Një mashtrim pervers që kalon çdo limit njerzor dhe që i shërben vetëm Ramës dhe hijes së tij,”- shkruan Kryemadhi.
Sërish Gazment Bardhi këmbëngulte në versionin e tij. I ndodhur në të njëjtë studio nga ku bëri publik premtimin e bërë ku dhe u lexua reagimi i Kryemadhit, Bardhi tha se Partia Demokratike dhe kryetari i saj, Lulzim Basha ka qenë për masivizim vote dhe futja në një listë të përbashkët.
Vetë kryedemokrati nuk ka reaguar ende…
