Ditën e sotme Kryeminstri Edi Rama vazhdoi me konsultimin publik me nxënësit duke u ndalur në Kamëz. Gjatë fjalës së tij Rama i dha shumë rëndësi zhvillimit të teknologjisë apo sporteve të reja që do të aplikohen në shkolla.
Rama u shpreh se teknologjia është shumë e rëndësishme dhe me të të rinjtë dhe jo vetëm mund të bëjnë çudira pavarësisht se nga janë. Gjatë një bashkëbisedimi me nxënësit në Kavajë, Rama ka treguar rastin e një 16-vjeçare në Durrës, e cila prej moshës 11 vjeçe, po punon me shtete të ndryshme si Polonia dhe Gjermania nga shtëpia.
“Përmes njohurive mbi teknologjinë, njeriu sot mund të bëjë çudira, pavarësisht nëse është në Kamëz, Gjermani apo Amerikë. Me këtë gjuhë është i pranishëm në një treg që është më i madhi sot global, i të gjithë aktivitetit dhe shërbimeve që bëhen online. Edhe në Shqipëri, pavarësisht se nuk ka pasur sistem të organizuar dhe mbështetje për ata që janë futur në këtë rrugë, ka jo pak të rinj që sot punojnë në tregjet ndërkombëtare duke qëndruar në shtëpi.
Në një konsultë në Durrës, një vajzë 16 vjece na tregoi se kishte 5 vjet që punonte për Poloninë, Gjermaninë dhe punonte nga shtëpia me kompjuterin e vet. Pra që në moshën 11 vjec. Kjo është norma në atë pjesë të botës rinore që merret me kodimin, programimin e tregun online.
Sot nuk është e nevojshme të jemi në një hapësirë për të shkëmbyer dijen apo për të marrë informacion. Po përgatisim një sistem me mësuesit më të mirë të mundshëm që do japin mësim pa qenë e nevojshme të jenë prezent fizikisht duke bërë që jo vetëm nxënësit të marrin cilësinë më të mirë të mësimit po edhe mësuesit që janë në klasë të rrisin kapacitetin. Këto do fillojnë të vihen në zbatim nga viti i ardhshëm shkollor sepse kërkojnë përgatitje”, tha Rama.
