Në fshatin Duhanas në Berat është regjistruar një vatër zjarri pasditen e sotme. Mësohet se zjarri është vënë aksidentalisht nga disa banorë të zonës, të cilët ishin duke djegur mbeturina në arat e tyre.
Flakët i ka favorizuar edhe era e fortë e cila i ka ndihmuar që të përhapen në një sipërfaqe më të madhe dhe të dalin jashtë kontrollit. Kanë qenë banorët e zonës ata të cilët kanë njoftuar policinë pasi nuk po arrinin ta vinin zjarrin nën kontroll. Flakët e zjarrit u përhapën me shpejtësi drejt tokave të tjera bujqësore, ndërkohë që në rrezik nga flakët ndodhet nën/stacioni elektrik i fshatit.
Mësohet se në vendngjarje kanë shkuar forca të shumta të repartit të shpëtimit nga zjarri, të cilët po përpiqen të neutralizojnë flakët dhe të shmangin përhapjen e tyre drejt nën/stacionit elektrik.
Duke qenë se zona është favorizuese për kalimin e mjeteve deri në zonën e zjarrit, në aksionin për fikjen e tij janë përfshirë 3 mjete zjarrfikëse dhe dhjetëra efektivë zjarrfikësish. Flakët ende vazhdojnë të përparojnë në toka të tjera bujqësore edhe pse vala më e madhe e tyre është neutralizuar nga forcat zjarrfikëse. Kujtojmë se edhe disa javë më parë në Fier u regjistruan tre vatra zjarri, flakët e të cilave dogjën pemë të ndryshme frutore por edhe hapësira pyjore duke kërcënuar zonat e banuara.
