Në një prononcim për mediat pas takimit me kreun e Partisë Demokratike, Lulzim Basha, kreu i komunës së Bujanovcit, Nagip Arifi i cili ditën e sotme ka zhvilluar takime me Metën, Majkon e Bashën në Tiranë ka folur për mediat. Gjithashtu ai u shpreh se ka informuar kryedemokratin Basha, për shqetësimin e shqiptarëve të Luginës së Preshevës.
Arifi ka akuzuar Beogradin se po kërkon spastrimin e Luginës, me çregjistrimin e paligjshme të shqiptarëve atje. Në përfundim të fjalës së tij ai u shpreh se shpreson shumë që shqiptarët një ditë do jetojnë të bashkuar në Evropën e bashkuar.
“Sot patëm një takim vëllazëror. Paradite u takova me Presidentin Ilir Meta, ministrin Majko, dhe tanimë me kreun e PD. E njoftova me problemet e sfidat e shqiptarëve kryesisht në Bujanovc. Si po vepron Serbia ndaj shqiptarëve të Luginës së Preshevës, si po përdor metodën e spastrimit etnik. Kërkuam ndihmën e shtetit shqiptar, sepse Shqipëria e fortë, Shqipëria në NATO, Shqipëria në BE, po ashtu një Kosovë e pavarur me pretendimin të jetë anëtare e NATO edhe shqiptarët e Luginës do të jenë më të sigurtë.
Shumë shpresoj se shqiptarët një ditë do jetojnë të bashkuar në Evropën e bashkuar”. u shpreh Arifi në një prononcim për mediat pas takimit.
