Kolegji i Posaçëm i Apelimit, siç duket është përfshirë nga kaosi dhe paniku e kjo për shkak se dy nga anëtarët e saj kanë probleme me sistemin e drejtësisë. E gjithë kjo “frikë” është shkaktuar nga hetimet që kanë nisur të zhvillohen duke shqyrtuar çështjet e komisionerëve të Vettingut.
Ishte pikërisht kryetarja e KPA-së ajo e cila e ka ngritur këtë shqetësim me anë të një shkrese, drejtuar SPAK dhe Gjykatës së Lartë.
Në shkresë, lakohen emrat e Ardian Hajdarit dhe Luan Dacit.
“Gjyqtarët e Kolegjit të Posaçëm të Apelimit, prej vitit 2020, janë përballur me kallëzime penale të bëra nga ish-subjektet e rivlerësimit, ndaj të cilëve është marrë masa disiplinore e shkarkimit nga detyra.
Për Luan Dacin ka një vendim të GJKKO të Apelit dhe nëpërmjet kësaj shkrese shprehim shqetësimin për gjykim të rekursit të paraqitur nga gjyqtar Daci, brenda afateve të parashikuara ligjore.
Gjyqtari Ardian Hajdari në muajin Korrik të këtij viti, është njoftuar nga SPAK, se ndaj tij ka një kallëzim penal dhe është regjistruar një procedim penal, po pa i atribuar një emër konkret”, thuhet në shkresën e KPA.
Sipas të njëjtës shkresë, gjyqtarët e Kolegjit shprehin shqetësimin se kallëzimet penale dhe procedimet lidhur me to si edhe mosshqyrtimi apo gjykimi, brenda afateve proceduriale veçanërisht i çështjeve të sipërpërmendura dhe jo vetëm, kanë vështirësuar ushtrimin e veprimtarisë gjyqësore të Kolegjit, për më tepër i ka vendosur ata nën një presion të vazhdueshëm për kryerjen e funksioneve të tyre kushtetuese, duke rrezikuar në këtë mënyrë seriozisht funksionalitetin e Kolegjit, për rrjedhojë dhe të vetë procesit të rivlerësimit.
