Kryeministri Edi Rama i shoqëruar nga ministrja e Shëndetësisë Ogerta Manastirliu, ka pritur në një vizitë në Tiranë Drejtorin Ekzekutiv të Kompanisë Pfizer, Albert Bourla, me të cilin kanë parë nga afër kushtet e ruajtjes së vaksinave dhe kanë diskutuar mbi planin e mëtejshëm të furnizimit.
Rama shprehu murënjohjen ndaj shefit të Pfizer, për të cilin tha se hapi dyert ndaj vendit tonë në momentin që më së shumti kishte nevojë.
“Sot është një ditë e veçantë për procesin e vaksinimit sepse kemi nderin dhe kënaqësinë të mikpresim shefin e madh të Pfizer-it i cili mund ta them me bindje është bërë një mik i yni, një mik i Shqipërisë. Na hapi derën në momentin më të vështirë kur ne shkuam në New York për të trokitur në derën e Pfizer në kushtet kur nuk kishim asnjë perspektivë të qartë. Folëm gjatë në New York dhe edhe pse nuk na premtoi aty për aty që çështja do të zgjidhej na dha fjalën që do bënte gjithçka për ta zgjidhur. Falë angazhimit të z. Bourla mundëm t’i merrnim vaksinat më parë se të tjerët. Dua t’ia shpreh në sy të tij dhe të opinionit publik, mirënjohje pafund për këtë ndihmë në mbrojtje të jetës së qytetarëve”, tha Rama.
