Një shpërthim me lëndë plasëse ka ndodhur në orët e para të mëngjesit në fshatin Toç, në Memaliaj, duke shënjestruar banesën e administratorit të Njësisë Administrative Qesarat, Butjan Kapa. Ngjarja ka ngritur shqetësim në zonë, ndërsa autorët kanë vepruar me shpejtësi dhe janë larguar pa u identifikuar.
Sipas të dhënave paraprake, lënda plasëse është vendosur në oborrin e banesës së Kapës, i cili është gjithashtu anëtar kryesie në Partinë Demokratike. Nga shpërthimi janë shkaktuar vetëm dëme materiale, kryesisht në disa dritare të banesës.
Pamjet filmike tregojnë se në ngjarje janë përfshirë dy autorë, të cilët kanë mbërritur me një automjet tip “Range Rover”. Pas vendosjes së lëndës plasëse, ata janë larguar në drejtim të aksit rrugor “Krahës-Memaliaj”, ku më pas, në afërsi të fshatit Qesarat, kanë djegur automjetin dhe janë arratisur në këmbë.
Vetë Butjan Kapa ka deklaruar se nuk ka konflikte me askënd dhe ka përjashtuar mundësinë që ngjarja të lidhet me detyrën e tij si administrator apo me angazhimin politik. Ai ka treguar në dëshminë e tij se pak para shpërthimit qeni i shtëpisë lehte vazhdimisht dhe ai ishte nisur të dilte për të parë se çfarë po ndodhte, por ishte ndaluar nga bashkëshortja.
Ndërkohë, policia ka rrethuar zonën dhe po vijon kontrollet për kapjen e autorëve, ndërsa hetimet po zhvillohen për të zbardhur plotësisht rrethanat e kësaj ngjarjeje.
“Memaliaj / Informacion paraprak
Më datë 06.04.2026, rreth orës 00:10, në oborrin e banesës së shtetasit B. K., 67 vjeç, në fshatin Toç, dyshohet se ka shpërthyer një sasi lënde plasëse, duke shkaktuar vetëm dëme materiale.
Autori/autorët, gjatë largimit, në aksin rrugor “Krahës–Memaliaj”, në afërsi të fshatit Qesarat, dyshohet se kanë djegur automjetin me të cilin lëviznin dhe më pas janë larguar në këmbë.
Shërbimet e Policisë vijojnë kontrollin e zonës për lokalizimin dhe kapjen e autorit/autorëve.
Grupi hetimor, nën drejtimin e Prokurorisë, vijon intensivisht veprimet hetimore për sqarimin dhe zbardhjen e plotë të rrethanave të ngjarjes, si dhe për identifikimin dhe kapjen e autorit/autorëve”, thuhet në njoftimin e policisë.
