Konkursi për drejtimin e Shërbimit të Onkologjisë në Qendrën Spitalore Universitare “Nënë Tereza” po shoqërohet me dyshime serioze për paracaktim të fituesit dhe shkelje të drejtpërdrejta të kritereve ligjore, duke e kthyer procesin në një çështje me pasoja të rënda për vetë sistemin shëndetësor.
Në garë janë dy kandidatë, një kirurg dhe një mjeke onkologe. Por sipas Vendimit të Këshillit të Ministrave, drejtuesi i një shërbimi duhet të jetë specialist në fushën përkatëse, në këtë rast onkolog. Kjo do të thotë se përfshirja e një kandidati jashtë kësaj fushe ngre menjëherë pikëpyetje mbi ligjshmërinë e vetë procesit.
Burime pranë sistemit shëndetësor bëjnë me dije se ekzistojnë dyshime të forta që fituesi është përcaktuar paraprakisht, duke e bërë konkursin një procedurë formale dhe jo një garë reale mbi bazën e meritës. Nëse këto pretendime konfirmohen, atëherë kemi të bëjmë me një shkelje të hapur të ligjit dhe deformim të standardeve mbi të cilat duhet të funksionojë përzgjedhja e drejtuesve në shëndetësi.
Ndërkohë që kandidatëve u kërkohen tituj akademikë, vite përvojë dhe një platformë zhvillimi 4-vjeçare, shqetësimi kryesor mbetet fakti se kriteri themelor, të qenit specialist në fushën përkatëse, rrezikon të anashkalohet. Kjo jo vetëm e zhvlerëson procesin, por vendos në pikëpyetje serioze cilësinë dhe drejtimin e një prej shërbimeve më të ndjeshme në vend.
Situata ka ngritur alarmin për integritetin e këtij konkursi dhe për rolin e institucioneve përgjegjëse që duhet të garantojnë respektimin e ligjit. Përballë këtyre zhvillimeve, pyetjet janë të qarta dhe kërkojnë përgjigje:
Kush po e imponon këtë emërim në kundërshtim me ligjin?
Dhe a është në dijeni Ministria e Shëndetësisë për një proces që po rrëshqet drejt një skandali të hapur?
Sepse në Onkologji nuk bëhet fjalë për një vend pune të zakonshëm. Bëhet fjalë për drejtimin e një shërbimi jetik, ku çdo vendim ndikon drejtpërdrejt në jetën e pacientëve dhe ku çdo shkelje e ligjit nuk është thjesht administrative, por me pasoja reale dhe të rënda.
