Ditën e sotme policia e Kurbinit ka proceduar dhe ka gjobitur me 2 mln lekë dy persona.
Ata u kapën duke gërryer shtratin e lumit Mat.
Sipas policisë, dy personat e proceduar janë shtetasit L.M 51 vjeç nga Lezha dhe B.A 55 vjeç nga Miloti.
Mesa duket mjedisi ka kaluar në dorë të dytë nga qeveria, pasi po procedohen penalisht vetëm “peshqit e vegjël” që gërryejnë ndonjë kovë vinçi me zhavor.
Shfrytëzimi pa kriter i mjedisit vazhdon të jetë një nga problematikat më të mëdha në vendin tonë, po ashtu si çdo problematikë që zgjidhet pasi bëhet publike në media, besojmë se kështu do ndodhë edhe me çështjen e mjedisit.
Disa ditë më parë u publikuan disa pamje nga lumi Mat, në shtratin e të cilit, kompania “Salillari” po kryen punime, ku u panë qartë kamionët dhe ekskavatorët e kompanisë “Salillari”.
Dy ditë më parë edhe gazeta “Reforma” e denoncoi ngjarjen, pasi duket edhe nga pamjet e publikuara që tokat bujqësore të kësaj zone rrezikojnë të përmbyten sërish në dimër për shkak të devijimit të rrjedhës së lumit.
Ky problem lidhet me gërryerjen e shtratit të lumit në mënyrë të pakontrolluar e në mënyrë të babëzitur nga kompani private që nuk u hyn një “gjemb në këmbë”.
Teksa, qeveria iu bën thirrje shqiptarëve të qëndrojnë brenda duke shmangur grumbullimet e shumta, këto kompani po ushtrojnë veprimtarinë e tyre pa kriter në terren, duke shmangur edhe protestat e qytetarëve.
Edhe ish-deputeti i Partisë Socialiste, Ndue Kola, po kontribuon në shkatërrimin e shtratit të lumit Mat.
Janë rreth 15 skrepa të firmës “A.N.K.” dhe firmës “Bardhi Konstruksion”, që kanë shqyer e po vazhdojnë të shqyejnë 22 kilometër shtrat të lumit Mat, në 6 zona me 12 qendra nxjerrje zhavorr e rërë.
Kompania nuk është e pajisur as me leje shfrytëzimi e as me leje mjedisore, teksa Ligji nr. 111 datë 15.11.2012, ndalon shfrytëzimin e shtretërve të lumenjve për 30 vite.
Në një komunikim i gazetës “Reforma” me Ministrinë e Mjedisit, kjo e fundit u shpreh se IKMT do të ndjekë penalisht të gjithë personat që bëjnë krim në dëm të mjedisit.
Duke marrë shtysë nga kjo përgjigje, vendosëm të kontaktojmë me Sekretarin e Përgjithshëm të Ministrisë së Brendshme, Plarent Ndrecën për ta pyetur se çfarë masash janë marrë ndaj kompanive “Salillari” dhe “Gjikuria” meqë Ministria e Mjedisit reagoi lidhur me ngjarjet.
Ndreca ende nuk ka kthyer një përgjigje lidhur me situatën dhe se si kanë vazhduar procedimet ndaj kompanive “Salillari” dhe “Gjikuria”.
Këto dy kompani kanë shkatërruar pa kriter mjedisin duke thyer hapur çdo ligj të vendit tonë.
Nisur nga impakti që ka roli i mjedisit edhe në situatë pandemie në të cilën ndodhemi, presim një përgjigje nga Ndreca në lidhje me masat ndëshkuese që do u jepen dy kompanive të sipërpërmendura.
