Policia e Gjirokastrës ka arrestuar një 43-vjeçare, e cila dyshohet se ka probleme të shëndetit mendor, pas denoncimeve dhe pamjeve të publikuara në rrjete sociale.
Sipas policisë, ajo kërcënonte qytetarët me thikë në rrugë, pranë stacionit të autobusëve në Lazarat, dhe tentonte t’u grabiste para. Gjatë incidentit, ajo ka dëmtuar lehtë një grua të moshuar, 67-vjeçare, me mjetin prerës.
Pas njoftimit të qytetarëve dhe analizës së pamjeve filmike, forcat e rendit kanë vepruar shpejt, duke e identifikuar dhe arrestuar të dyshuarën për veprën penale të “Kërcënimit” dhe “Dëmtimit të trupit”.
Njoftimi i policisë
Në lidhje me një video të publikuar paraditen e sotme në rrjete sociale në të cilën shfaqet një shtetase që kërcënon me thikë qytetarët dhe iu kërkon para, ju informojmë se:
Shërbimet e Drejtorisë Vendore të Policisë Gjirokastër, menjëherë pas marrjes së njoftimit për rastin, shoqëruan në ambientet e Policisë, shtetasen Z. V., 43 vjeçe, e cila dyshohet se vuan nga probleme të shëndetit mendor.
Në vijim të veprimeve procedurale u bë arrestimi i 43-vjeçares, për veprën penale “Vjedhja me dhunë”, mbetur në tentativë. Ditën e sotme, në stacionin e autobusëve në fshatin Lazarat, ka dëmtuar lehtë me mjet prerës, një 67-vjeçare, që ajo t’i jepte para.
Drejtoria Vendore e Policisë Gjirokastër falënderon dhe fton mediat e qytetarët që të denoncojnë rastet e paligjshmërive në çdo formë të shfaqjes së tyre, në numrin 112, duke iu garantuar reagim të menjëhershëm.
