Tensione në Rrjoll, përplasje me Policinë, 6 banorë shoqërohen pasi bllokuan “Gener 2”

Situata në Rrjoll të Velipojës është përshkallëzuar sërish këtë mëngjes, pasi banorët i dolën përpara makinerive të kompanisë “Gener 2” dhe bllokuan nisjen e punimeve për ndërtimin e resortit luksoz. Ngjarja ka sjellë ndërhyrjen e menjëhershme të Policisë dhe shoqërimin e gjashtë personave.

Që në orët e para të mëngjesit, banorët i zunë pritë punonjësve të kompanisë në pronësi të Bashkim Ulajt, duke mos lejuar kalimin e mjeteve në zonën ku po zhvillohet projekti. Ata pretendojnë se prona u është grabitur dhe prej ditësh ndodhen në protestë të vazhdueshme, në një klimë të tensionuar dhe me përplasje të përsëritura me forcat e rendit.

Rreth orës 08:30, efektivët e Policisë mbërritën në vendngjarje dhe ndërhynë për të larguar banorët nga rruga, duke hapur kalimin për makineritë. Gjatë ndërhyrjes u shoqëruan në komisariat gjashtë persona, për rezistencë.

Mes tyre ndodhet edhe Luçiana Kokaj, e njohur për qëndrimin e saj aktiv në çdo protestë të zhvilluar në zonë, ku ka kërkuar publikisht mbrojtjen e të drejtave të banorëve.

Tensionet në Rrjoll mbeten të larta, ndërsa banorët paralajmërojnë se nuk do të tërhiqen nga kundërshtimi i projektit që, sipas tyre, po ndërtohet mbi tokat që u përkasin. Situata në zonë vijon të jetë e brishtë.