Studentët pjesëmarrës në protest janë mbledhur në studion e emisionit “Opinion” ku janë duke treguar sesi nisi protesta.
Një student i arkitekturës ka thënë se pikërisht nga ky universitet nisi dhe protesta, kur ata u njohën në sekretari me VKM nr.288 që thoshte se një student përveç taksës është i detyruar të paguaje edhe për kreditet e provimeve të prapambetura. “Tarifa ka qenë 17.500 lekë të vjetra për një kredit, ndërkohë që tarifa e shkollimit është 400 mijë lekë në vit bachelori dhe 2 milion leke masteri total”, tha ai.
Një tjetër studente tha se sipas një përllogaritjeje të kryer nga lëvizja “Për Universitetin” një student i ardhur nga rrethet përgjatë një viti akademik në Tiranë, duke llogaritur tarifat e shkollimit, qeranë, transportin, librat, detyrat e kursit , veshmbathjet i duhet të shpenzojë 5 milion lekë të vjetra. Shumë nga studentët e pranishëm në studio kanë treguar se detyrohen që paralelisht të punojnë, ndërsa kryejnë studimet.
Ndërsa pedagogu i UT-së, Ervin Goci, deklaroi se Bordi i Administrimit të Universitetit të Elbasanit është mbledhur vetëm 7 herë gjatë një viti dhe anëtarët e tij i kanë përcaktuar vetës një shpërblim prej 350 mijë lekë.
Goci tha se kjo është diçka e papranueshme, pasi ky bord mblidhet një herë në muaj, rreth një orë dhe i përcakton vetës edhe shpërblim.