Mbledhja e komisionit hetimor për çështjen e sterilizimit u shoqërua me tensione, ndërsa ish-ministri i Shëndetësisë, Ilir Beqaj, u paraqit për të dhënë dëshminë e tij. Gjatë seancës,
Beqaj kërkoi nga kryetarja e komisionit, Albana Vokshi, që t’i ofrohej logjistika e nevojshme për të paraqitur një deklaratë me materiale audio-vizive, duke kërkuar mundësinë për të ilustruar fjalimin e tij me foto dhe video.
Megjithatë, Vokshi i sqaroi se komisioni nuk dispononte pajisjet e nevojshme për këtë, duke i kërkuar Beqajt të vazhdonte dëshminë pa përdorimin e materialeve vizuale. Pas disa mosmarrëveshjeve dhe paqartësish, mbledhja u ndërpre dhe u vendos që të shtyhej për një moment tjetër.
Pjesë nga debati:
Ilir Beqaj: Kam ardhur të përgjigjem si dëshmitar. Jam konsultuar me avokatin dhe dua që deklaratën ta ilustroj me mjete audio-vizive.
Albana Vokshi: Nuk kemi infrastrukturën për këtë. Mund të na japësh materialet për t’i administruar.
Beqaj: Për 7-8 muaj më keni akuzuar si hajdut.
Vokshi: Kam 10 vjet, jo 7 muaj. SPAK ka 7 muaj.
Beqaj: Sot jemi këtu për të sqaruar, qoftë gjysmën e mençurisë sime. Ligji më njeh të drejtën e një deklarate të kontekstualizuar dhe dua ta ilustroj me mjete vizuale. Ju nuk e dini çfarë kam bërë, nuk mund ta dini pa e parë. Ngjarjet fillojnë që në 2009, kur një ministër e bleu centralin dhe e la në qese. Sipas nenit 2, pika 7, vendimi i ndërmjetëm është vendim i marrë në çdo fazë të hetimit dhe pyetjes së dëshmitarëve.
Vokshi: Këtë nen e ka rrëzuar Gjykata Kushtetuese. Do flasësh për të drejtat e tua apo për ato të komisionit?
Beqaj: Kemi bërë një kërkesë dhe ligji përmban një nen që përcakton mënyrën e marrjes së këtij vendimi. Më jepni një vendim për kërkesën, siç lexova: një deklaratë që dua ta ilustroj me foto dhe video.
Vokshi: Do e bësh deklaratën? Nëse jo, do nis me pyetjet. Do e bëni deklaratën, zoti Beqaj?
Beqaj: Do ta bëj deklaratën, sapo të më jepni mundësinë. Fillimisht, kam bërë një kërkesë.
